Šef statneje kenclije Sakskeje je so dźiwał, kelko młodych wobličow w redakciji našeho wječornika wuhlada. Tola bě hišće dalšich překwapjenkow, jako wón „wuznamny medij za Łužicu“ wopyta.

Budyšin (SN/mb). Prěnja stacija šefa sakskeje statneje kenclije dr. Andreasa Handschuha (bjezstronski) na wčerawšim wopyće w Ludowym nakładnistwje Domowina (LND) běše wobłuk rozšěrjenje. Tule jemu Marian Korjeńk, zamołwity za nowiny a časopisy, mjez druhim syć 56 roznošowarjow Serbskich Nowin (SN) rozkładźe. Woni so wo to staraja, zo ma serbski dźenik najskerje najspušćomniši system dodawanja nowin po cyłej Němskej.