Łužiska kupjel we Wojerecach budźe wot jutřišeho dwě njedźeli zawrjena. Čas, hdyž jenož mało ludźi do kupjele a sawnow chodźi, wužija za rjedźenje a za reparatury. Zdobom su prózdniny nimo. Nětko chcedźa tež dotal pobrachowace serbske popisanja dodać.

Wojerecy (SN/jp). Zo ma so technika w kupjeli, kaž na přikład klumpa, připrawa za kumštne žołmy abo sawna prawidłownje hladać, je samozrozumliwe. W zymje, hdyž su kupjele pod hołym njebjom zawrjene, su kupanske hale hłowny cil młodych swójbow a staršich porikow. W lěću pak so woni radšo wonka w lěsnych kupjelach abo při jězorach wočerstwjeja. Tuž je to za personal kupanskich halow prawy čas, swoje mašiny hladać a je-li trjeba reparować. Tež Łužiska kupjel we Wojerecach je so rozsudźiła, swój dom nětko zawrěć.