Hrubjelčicy. Šesty raz přeprosyštej Maćijec swójba a Serbske ewangelske towarstwo minjenu sobotu na dworowy swjedźeń w Hrubjelčicach. Spočatneho špatneho wjedra dla drje planowane swójbne pućowanje popołdnju wotprajichu, ale chrobli pjećo podachu so přiwšěm na směr Ćěchorjecy, přez Słónkecy a Dobrušu na turu kołowokoło wsy.
Po tym zo běše so wuwjedriło, přichwatachu tójšto na swačinu a dwór so poněčim pjelnješe. Na ekumeniskim nyšporu zličichu wjace hač 100 wopytowarjow, mjez druhim z Budyšina, Wojerec, Drježdźan, delanskich wsow, Radworja, Rakec, Slepoho a narańšich kónčin. Najdlěši puć měješe znowa Meyerec swójba z Münstera. Serbski superintendent Krystof Rummel a tachantski farar Wito Sćapan nutrnosć po zwučenym wašnju zhromadnje z ewangelskimi a katolskimi wěriwymi swjećeštaj. Dźěći lětušich Budyskich nabožnych dnjow jón ze spěwom a gitarowym přewodom Lydije Maćijoweje wobrubichu.
