Rakecy (JK/SN). Hłowny wobsah wuradźowanja Rakečanskeje gmejnskeje rady po lěćnej přestawce běchu zašły tydźeń dalše kroki nastupajo projekt Rakecy-juh. Po informacijach wjesnjanosty Swena Nowotneho (CDU) je gmejnska rada wotzamknyła tak mjenowane měšćansko­twarske zrěčenje z hłownym inwestorom. Tute zrěčenje zaruči gmejnje wěstosć planowanja a zachowa ju před njepředwidźanymi­ financnymi problemami. Inwestor přewozmje wšitke wudawki­ za zwoprawdźenje projekta. Zdobom­ móžachu na posedźenju, na kotrymž so tež zastupjerka inwestora wobdźěli, dalše wobmyslenja wobydlerjow dla twarskeho předewzaća a z tym zwjazanymi wobstejnosćemi wotstronić. Hdy so na předwidźanej płoninje dźěłać započina, njemóže wjesnjanosta hišće rjec. Mnohe přihoty su hišće trěbne. Wo tym budźe gmejnska rada w přichodnych posedźenjach dale wuradźować a wobydlerjow wo wuwiću tež dale informować. Snano budźe klětu hižo něšto wot twarskich naprawow widźeć.