Pančicy-Kukow (SN/MWj). Jara dobry wothłós žněješe dźěćacy a swójbny swjedźeń, kiž je Domowinska skupina Pančicy-Kukow wčera wuhotowała. Přewjedli su jón prěni raz w Komunikaciskej arenje na centralnym městnje wosrjedź wsy a nic kaž w minjenych lětach na Kukowskim hrodźišću. Něhdźe 250 ludźi su na terenje­ něhdyšeho hosćenca witali, tójšto wjace hač zašłe lěta. Přišli běchu wšitke generacije: dźěći ze staršimi runje tak kaž wopytowarjo srjedźneje staroby a wuměnkarjo. Mjeztym zo Domowinska skupina kofej, tykanc a pomazki poskićowaše,­ staraše so Pančičansko-Kukowski młodźinski klub wo napoje a pražene kołbaski.