Staršiski list Worklečanskeje šule tójšto njeměra budźił

Worklecy (SN/StŠ). Wčera dopołdnja staršim rozesłana informacija Worklečanskeje šule, zo měli na to dźiwać, zo njejsu jich dźěći same po puću, je w běhu dnja strach, njewěstosć a tójšto diskusijow zbudźiła. „Tajke něšto so w běhu jenož někotrych mjeńšin přez socialne medije kaž whatsapp tysacy króć dźěli“, praji André Kober, wobydlerski pólcaj w zarjadniskim zwjazku Při Klóšterskej wodźe w Pančicach-Kukowje.

W lisće piše šula: „Dóstachmy dźensa telefonat, zo je tučasnje muž po puću (mjez Pančicami-Kukowom a Miłoćicami), kotryž dźěći narěči a wobkedźbuje.“ Nimo wopisanja wosoby poda so w informaciji tež awtowa značka jězdźidła a k tomu rěka: „Policija je informowana. Jeli Wam tute awto napadnje, prošu jedyn wobraz wot prědka a zady sčinić a policiji sposrědkować. Prošu hladajće, zo njeje Waše dźěćo same po puću.“