Wojerecy. Lubowarjo přirodnych hojenskich mocow móža spočatk oktobra hnydom dwaj zajimawej poskitkaj wužiwać a při tym swoje znajomosće serbšćiny pohłubšić. Prěni wotměje so póndźelu, 5. oktobra we Wojerowskim Domowinskim domje, a to wot 14 do 15.30 hodź. a hišće raz wot 16 do 17.30 hodź. Mo­tiwatorka za serbsku rěč Marija Šołćic ze Syće za serbšćinu a regionalnu identitu Zari předstaji zelene smoothije, za kotrež wona hač do sydom wšelakich zelow měša.­ Wobdźělnicy wšitko sobu přiho­tuja a wězo tež woptawaja. Při tym nawuknu serbske pomjenowanja jednotliwych rostlin.

Druhi termin je zelowe wuchodźo­wanje z pedagogowku za zela a dźiwje rostliny Reginu Krawcowej, kotrež wotměje so pjatk, 9. oktobra wot 16 do 18 hodź. Započatk budźe při bywšej šuli w Koćinje. Wottam poběža zajimcy zhromadnje wokoło tamnišeje mlokarnje, hdźež namakaja drje wužitne zela za zymu a za strowe zežiwjenje. Tute zhromadnje předźěłaja, tak zo móža je w swójskej kuchni wužiwać. Wobdźělnicy njezhonja jenož serbske pomjeno­wanje zelow, ale tež někotrežkuli rjane přisłowo.