Gmejnscy radźićeljo zwyšenje staršiskeho popłatka wobzamknyli
Hamor (AK/SN). Za wopyt swojich dźěći w žłobiku, pěstowarni a horće dyrbja starši w Hamorskej gmejnje wot lěta 2027 wjace płaćić. To je snadna wjetšina gmejnskich radźićelow na swojim zašłym posedźenju wobzamknyła. Za dźewjećhodźinske hladanje w žłobiku podróši so popłatk wot 235 na 255 eurow wob měsac, za samsny čas w pěstowarni płaća starši přichodnje 125 město dotal 116 eurow a šěsćhodźinski wopyt w horće podróši so wot 64 na 84 eurow. „Z tym smy přeco hišće pod hranicu, kotruž nam Sakska předpisuje. W Zhorjelskim wokrjesu pohibujemy so w delnim a srjedźnym wobłuku“, rjekny Hamorski wjesnjanosta Hendryk Balko.
