Chasow (SN/MWj). Na wosebite wašnje chcedźa sobotu, 14. nowembra, njeboh Arnulfa Sachsu počesćić. Při pućowanskej hěće mjez Chasowom a tamnišim Starym hatom připrawja za njeho wopomnjensku taflu. Na to přeprošuje bratr zemrěteho, Ludwig Sachsa z Radworja.
Arnulf Sachsa je wjele lět swěru pućowanske šćežki w Njeswačanskej gmejnje hladał. Tež při hladanju pućikow zwonka gmejny bě jemu swój bohaty skład nazhonjenjow z wužitkom. Mnozy kolegojo z wokolnych komunow su z toho profitowali, wšako bě Arnulf Sachsa stajnje zwólniwy, jich při najwšelakorišich projektach podpěrować.
Pućowanska hěta pola Chasowa bě jemu wosebje wutrobna naležnosć. Hač do kónca je so Arnulf Sachsa wo to starał, zo so hěta zachowa a je jeje třěchu porjedźał. Po tym zo bě zašłu zymu znjezbožił, wón lětsa w awgusće w starobje 82 lět zemrě. Dwaj dnjej do planowaneho přepodaća ponowjeneje hěty by hibićiwy Njeswačan swoje 83. narodniny swjećił.
