Budyski młodźinski dujerski orchester je sobotu na nazymskim koncerće w Malešecach wutroby něhdźe sto připosłucharjow hłuboko jimał. Wopytowarjo njejsu so wot wulkeho wětřika wottrašić dali a dožiwichu w cyrkwi hudźbne chłóšćenki.

Malešecy (at/SN). Młodźi hudźbnicy pod nawodom Alexandera Herrmanna wobradźichu publikumej krasne dožiwjenje. Hižo při hłosowanju instrumentow jich připosłucharjo z přikleskom překwapichu. Zazběh tworješe kwěćel serbskich štučkow, kotryž bě Werner Frenzel swój čas aranžował. Mjeztym je to kruty wobstatk repertoira ćělesa. Hdyž pěsnje kaž „Dźens je swjedźeń“, „Rjana Łužica“, „Hory módre“, „Zahraj nam rejku“ abo „Wjesele dźensa“ zaklinčachu, wopytowarjo hnydom reagowachu: Čumpachu w takće z nohu a kolebachu z hłowu. W běhu programa zahra orchester dalšej serbskej spěwaj „Boleraz“ a „Wo ničo so ja njestaram“. Charakteristikum wobeju je chětro měnjacy so takt. „To běše młodostnym wosebite wužadanje“, dirigent rozpra­wješe.