Na slědach pokutnych křižow a smjertnych kamjenjow pola Budyšina

Jaseńca (SN/MWj). Mjez Kinsporkom a Zhorjelcom je wjace hač 250 kamjenjow a kamjentnych křižow, kotrež dopominaja zwjetša na zrudne podawki zašłosće­. Tak mjenowane pokutne křiže a smjertne kamjenje buchu něhdy tam nastajene, hdźež je so mordarstwo abo hinaši njeskutk stał. K někotrym tajkim swědkam dawnych časow wjedźeše minjenu sobotu ekskursija, kotruž bě rěčny motiwator Lucian Kaulfürst organizował. Wón bě Bosćija Čórlicha z Hruboćic přeprosył, kotryž so jako wuběrny znajer historiskich­ kamjenjow a z nimi zwisowacych podawkow wopokaza. Njeboh farar Clemens Hrjehor bě jemu nastork dał, so z tutymi swědkami zaběrać.

Tak dojědźe sej dźesać wobdźělnikow wuprawy ke kamjenjej na polu pola Jaseńcy. Tam bě 1669 mać swojej dźěsći zamordowała,­ dokelž jej hižo zežiwić njemóžeše.­ Za to bu wona lěto pozdźišo w Budyšinje zjawnje wotprawjena. Do kamjenja su hłowje a sekera zadypane. Nimo jěducemu pak wón na zarosćenym nasypje při dróze scyła njenapadnje.