Njebjelčicy (SN/StŠ). Jednohłósnje, spěšnje a efektiwnje – takle hodźi so wčerawše posedźenje gmejnskeje rady w Njebjelčicach zjeć. Najzajimawši dypk, mjenujcy spřisahanje noweho wjesnjanosty Měrka Domaški, dyrbjachu spřećiwjenja přećiwo wólbam wjesnjanosty dla z dnjoweho porjada šmórnyć. Dalše dypki zjawneho dźěla posedźenja wotdźěłachu gmejnscy radźićeljo za to bjez wjetšich a dołhich diskusijow. Tak dojednachu so a hłosowachu za nakup dalšeho trěbneho wuhotowanja za wohnjowe wobory w Njebjelčicach, Pěskecach a Miłoćicach. Za dohromady něšto wjace hač 14 000 eurow maja kameradojo wjacore nowe wohnjoškitne nahłowniki kaž tež cholowy a kapy dóstać. Nimo toho dojednachu so gmejnscy radźićeljo, zo wěcy z gmejnskeho wobsydstwa, na přikład piwowe ławki a blida, stany atd. w přichodźe hižo k dotalnym kondicijam njewupožča. Płaćizny su w lěće 2007 postajili, tuž hižo časej njewotpowěduja. Nowe rjadowanje chcedźa radźićeljo zhromadnje nadźěłać.