Wuměłstwo w Lutobčanskim knježim domje
Lutobč (UM/SN). Za čas NDR měješe Lutobč wosebitosć: W knježim domje Radworskej gmejnje přisłušaceje wsy bě jedna z najwoblubowanišich diskotekow cyłeho tehdyšeho Budyskeho wokrjesa. Na to dźensa hižo ničo njedopomina. Kölnski wuměłc Wolfhard Röhrig bě w Lutobču po dołhim pytanju městno namakał, hdźež móžeše přichodnym generacijam swoje wobšěrne dźěło zachować. Lětsa 14. měrca je Wolfhard Röhrig zemrěł.
W lěće 2015 bě wón jako hižo 85lětny do Lutobča přišoł. Čłowjek njeby wěrił, što je wón w tajkej wysokej starobje hišće wšitko změnił a pohibował. „Wšitko, štož je tule widźeć, je wón takrjec stworił“, praji jeho wudowa dr. Lilli Ringel. Přetož wuměłc bě perfekcionist. Wšo dyrbješe jeho předstawam dokładnje wotpowědować. Za wšitko měješe hotowy plan we hłowje. Sam je so wězo tež gratu přimał. „Jako bu stary wjerch žurle, tehdy hišće wot diskoteki módry ze žołtymi hwězdami, wotklepany, je wón sam wotpadki z bowom dele nosył“, wudowa powěda. „Tež zarosćenu zahrodu je wón wurjedźił.“ Hišće z 90 lětami je Wolfhard Röhrig z trawusyčakom jězdźił.
