Mikławš Krawc narodźi so w delanskich Sernjanach a přežiwi dźěćatstwo w ryzy serbskej wokolinje. Kaž někotryžkuli jeho rowjenk poda so po skónčenju ludoweje šule 1947 do čěskich Warnoćic na serbski gymnazij. Tam nasrěba so słowjanskeho ducha, w kotrymž je čas žiwjenja spomóžnje skutkował. Po abiturje na prěnjej Serbskej wyšej šuli w Budyšinje studowaše na pedagogiskim instituće w Małym Wjelkowje wučerstwo a skutkowaše potom jako nowowučer w błótowskich Bórkowach, pomhajo tak natwarjeć serbske šulstwo w Delnjej Łužicy.

W běhu krótkeho časa trjebachu serbske šule tehdy nuznje wučbne plany a wučbnicy za wučerjow. Serbskich pedagogiskich wědomostnikow njebě a serbska wotnožka Němskeho pedagogiskeho centralneho instituta (pozdźišo Akademija za pedagogiske wědomosće APW) wołaše za wučerjemi z praksy. Mikławš Krawc bě jedyn z nich, kotřiž so do noweho nadawka zanurichu. Hač do politiskeho přewróta wón serbske šulstwo z wažnymi wudźěłkami přewodźeše.