Hórki (SN/BeW). Rjad lětušich nazymskich koncertow so nachila. Sobotu koncertowaše Worklečanska hudźbna dwójka Da&Da acoustic duo zhromadnje z hosćom Maxom Schneiderom-Grajcarekom na žurli Smolic statoka w Hórkach. Na połsta zajimcow bě sej tam dojěło. A zawěsće njejsu so mjerzali, wšako dožiwichu na městnje hnydom tři premjery. Sprěnja: Hazec mandźelskaj njeběštaj serbski nazymski koncert hišće ženje do toho na tajke wašnje wuhotowałoj. Zdruha: Gitarist a spěwar Darek Haza bě na tekst dźěćaceje basnje „Nazyma“ z pjera Bianki Wjeńcyneje spěw skomponował. A střeća: tež koparjo Zeleno-běłych Hórki mějachu swoje wjeselo. Darek Haza njeje jenož profijowy hudźbnik, wón po swjatoku tež pola starych knjezow za bulom honi. A tak je składnostnje koncerta za swoje mustwo nowu štučku z titulom „Na towarstwo“ spisał. Nimo hudźbnych chłóšćenkow w serbskej, jendźelskej a bołharskej rěči sydaše za hosći koncerta serbska kwasna jědź.
Jutře, wutoru, 17.11., zakónči rjad nazymskich koncertow skupina Wólbernosće w 19 hodź. w awli Šule Ćišinskeho w Pančicach-Kukowje.



