Jedne z najwoblubowanišich adwentnych wikow su Wjacławske
Budyšin (CS/SN). Budyske adwentne wiki wopyta kóžde lěto wjace hač 200 000 hosći. Mjez nimi su mnozy ze susodneje Pólskeje a Čěskeje. Tuž su tež mnohe poskitki w tutymaj rěčomaj popisane. Lětuše Wjacławske wiki wotewru 27. nowembra w 11 hodź. z 80 wikowarjemi a gastronomami. Zdobom wabja mnohe kulturne wjerški. Tak spěwa po wotewrjenju wikow z Karstenom Vogtom a kralom Wjacławom chór Budyšin. Cyłkownje planuja 37 live-wustupow solistow abo skupinow. Marxec pjekarnja napječe štyri metry dołhi wosušk, kotryž wyši měšćanosta 29. nowembra nakraje.



