Budyšin (SN/bl). Na 27. Wendish Fesće minjenu njedźelu w Texasu poby lětsa delegacija jědnaće ludźi Budyskeho Němsko-Serbskeho ludoweho dźiwadła. Tójšto wustupow tam mějachu a zahorichu přihladowarjow z njewšědnym serbsko-němsko-jendźelskim programom. Něhdźe 2 500 ludźi bě na swjedźensku łuku w Serbinje přišło, zo bychu Łužičanow dožiwili. Hosćićeljo měnjachu, zo bě hudźbna skupina najlěpša, kotruž hdy na tamnišim swjedźenju mějachu.
Hudźbna skupina Floppy dolls zawjeseli publikum ze serbskimi šlagrami 70- a 80tych lět kaž tež z delnjoserbskej narodnej drastu. Tón jedyn abo tamny jendźelski spěw tohorunja zaklinča. Intendant NSLDź Lutz Hillmann překwapi Texasčanow na basowej gitarje. „Jimacy běše wokomik, jako na wjeršku našeje jězby, Wendish Fesće, starc spontanje na jewišću serbsku pěseń zaspěwa“, powěda Madleńka Šołćic, zastupjerka intendanta a dramaturgowka NSLDź.
Choćebuz (AW/SN). 32 twórbow łužiskich komponistow a dalše – klasiskeje kaž filmoweje hudźby – zaklinča we wobłuku 42. Choćebuskeje hudźbneje nazymy. Wona zahaji so štwórtk, 1. oktobra, w delnjołužiskej stolicy.
Kóždej dwě lěće dožiwja město Budyšin wulki swjatk dujerskeje hudźby. Kónc tydźenja bě zaso raz tak daloko. Ale tež na někotrych městnach zwonka łužiskeje stolicy je dujerska hudźba zaklinčała.
Budyšin (CS/SN). XII. mjezynarodny festiwal dujerskeje hudźby, na kotryž bě spěchowanske towarstwo Budyskeho młodźinskeho dujerskeho orchestra ně- hdźe 700 hudźbnikow do sprjewineho města přeprosyło, bě kónc tydźenja połny wuspěch. Hižo zahajenski koncert pjatk wječor w Marje-Marćinej cyrkwi přiwabi něhdźe 800 připosłucharjow. Hromadźe z młodźinskim dujerskim orchestrom zahudźi pozawnowy chór wosadow swj. Michała a swj. Pětra pod nawodom kantora Dannyja Schmidta. Solist bě Jens-Uwe Mürner z Drježdźan, kiž je před lětami Budyskemu młodźinskemu orchestrej přisłušał. Mjez druhim zaspěwa wón hnujace „Nessun Dorma“ z opery „Turandot“. Na pišćelach hraješe młody serbski organist Feliks Brojer. Wopytowarjo słyšachu wulku paletu dujerskeje hudźby wot klasiskich kruchow hač k modernym.
Eisenhüttenstadt běše wólbna domizna z Njebjelčic pochadźaceho serbskeho grafikarja a molerja Jana Hanskeho. Składnostnje jeho 90. posmjertnych narodnin 24. nowembra 2015 wěnuje jemu tamniši měšćanski muzej přehladku twórbow.
Eisenhüttenstadt (SN/at). Nowy wuslědk płódneho zhromadneho dźěła Eisenhüttenstadtskeho měšćanskeho muzeja a Serbskeju muzejow Budyšin a Choćebuz je sobotu w Eisenhüttenstadće wotewrjena wustajeńca „Jan Hanski – wopon, lakowe čolenje, plakat“. Z njej wopominaja serbskeho wuměłca Jana Hanskeho w kónčinje jeho tworićelskosće. Je tuž jenož logiske, zo stej serbskej zastupjerce wobsahowe akcenty na přewšo poradźenym wotewrjenju stajiłoj.
Wosebitosć oktoberskeho čisła Rozhlada njetči jenož w tym, zo swjeći naš měsačnik 65ćiny, ale tohorunja w tematikach za młodu generaciju. Młody čłowjek steji w srjedźišću časopisa, sprěnja, dokelž bliži so lětuša schadźowanka, a zdruha, přetož chcyli so dokładnišo z profilom hudźbnych skupin JANKAHANKA a SerBeat zaběrać. Byrnjež přinošk Trudle Malinkoweje žadyn tučasny studentski abo młodźinski zjaw njewobjednawał, njewotchila so na žadyn pad wot tematiki „młodosć“. Na detektiwne wašnje wotkrywa znata publicistka stawiznu pozabyteje fotografije z archiwa Budyskeje Michałskeje wosady. Krok po kroku rozhladuje so po žiwjenskich pućach dźesać zwobraznjenych gymnaziastow, z kotrychž wuńdźe dźesać kulturnych serbstwu přichilenych prócowarjow w Hornjej a Delnjej Łužicy.
Drježdźany (aha/SN). Wjace hač 20 ludźi bě wčera na premjeru Serbskeje protyki 2016 do Drježdźanskeho knižneho domu Łóškecy přišło. Kaž nawjedowaca lektorka LND Janka Pěčkec de Lévano zwurazni, „je to prěni raz w stawiznach Protyki, zo zeńdźemy so k tomu w sakskej stolicy“.
Mjeztym třeći raz wuńdźe Protyka pod redaktorstwom Pětra Šołty, kiž měješe ideju, so tónkróć wěnować městu Drježdźanam. Přiběracej ličbje Serbow je sakska stolica dźensa z domiznu. Zo pak su Serbja tam zdawna swoje slědy zawostajili, wo tym swědči dźesać přinoškow mjez cyłkownje 37 wozjewjenymi. Pisana měšeńca nastawkow za wšě generacije saha wot pućowanskich reportažow přez powědančka wo lóštnych swjedźenjach a nałožkach hač k wopisanju wobhladanjahódnych městnow. 100lětna protyka pak njeje separatnje zapřijata; wona je nětko w kalendariju za kóždy měsac wuzběhnjena.
Njedźelu, 5. septembra, wotmě so na Lichańskim hrodźe portretowy koncert z twórbami Jana Cyža. Pod hesłom „Wot tradicije hač k modernje“ dožiwi něhdźe 80 wopytowarjow zajimawy, naročny a napjaty zarys kruchow serbskeho komponista. Titulej zarjadowanja wotpowědnje, kotrež běše mjez druhimi zapósłanča zwjazkoweho sejma Marja Michałkowa tež składnostnje njedawnych 60. narodnin wuměłca organizowała, skićeše koncert wurjadny dohlad do dotalneho oeuvre Cyža, při čimž so rjad skerje z nowočasneho do klasiskeho plećeše.