Druha najstarša šulerska starobna skupina beachvolleyballa je w Budyskej Sprjewinej kupjeli wuchodosakske finale přewjedła. Šulerjo 8. a 9. lětnika Serbskeho gymnazija Budyšin (SGB) wubědźichu sej we wurisanju „Młodźina trenuje za olympiju“ znowa slěbro.
Při rjanym słónčnym wjedrje wotmě so minjeny tydźeń kónčne regionalne koło starobneje skupiny III w beachvolleyballu. Do Budyskeje Sprjewineje kupjele dojědźechu sej zastupjerjo třoch gymnazijow a Wyšeje šule Niska, zo bychu kwalifikanta za krajne finale zwěsćili. Znowa přesadźichu so holcy a hólcy Christiana Weisoweho gymnazija Žitawa, dokelž běchu atletisce a technisce najlěpši.
