Na Olympiskich zymskich hrach w Južnej Koreji, hdźež maja něhdźe 3 000 wobdźělnikow, je mjeztym po połčasu. Nimo atletow je tam na přikład tež 600 ludźi za telewiziju ARD/ZDF: žurnalisća, kameramužojo abo wobrazowi režiserojo. Za ARD a ZDF dźěłataj na olympiadźe tež Serbaj: rodźeny Dubrjenčan Bosćij Wels a rodźeny Budyšan Měrćin Funka. Funka stara so zhromadnje z kolegami wo to, zo móžemy sej wubědźowanja w biatlonje, sněhakowanju a sankowanju na sćelakomaj ARD a ZDF wobhladać. Žurnalisća Serbskeho rozhłosa su z Měrćinom Funku telefonowali a rozmołwu tež sportowej redakciji SN přewostajili.
Trjechi, zo je w Pyeonchangu tak zyma, kaž to naše medije často naspomnjeja?
M. Funka: Je jara zyma, wětřika dla wšitko hišće zymniše začuwaš. Wutraješ pak, dokelž je wjedro jara suche. Mi so to samo lubi, je kaž w zymskim dowolu.