Dalši wrotar je zrěčenje pola Łužiskich lodohokejowych liškow podpisał. 28lětny Němc Daniel Filimonow přińdźe wot Běłych mjedwjedźow Hammer z třećeje ligi do Běłeje Wody do DEL2. Swoje wukubłanje k wrotarjej absolwowaše Filimonow pola EV Regensburg w šulerskej a młodźinskej zwjazkowej lize, kaž tež w Němskej dorostowej lize (DNL). W dalšim přeběhu swojeje karjery steješe wón za Deggendorfer SC w třećej lize, kaž tež Straubing Tigers w DEL na lodźe. Přez Blue Devils Weiden a EHF Passau Black Hawks přińdźe wón w lěće 2021 do Hammera a steješe tam na tři lěta mjez žerdźomaj. Cyłkownje absolwowaše 1,81 metrow wulki a 81 kilogramow ćežki wrotar za Běłe mjedwjedźe 104 partijow we wyšej lize sewjer.

Přidatnje budźe 21lětny Němc Leon Jessler, najprjedy raz hač do přestawki narodnych hrow pola Liškow w DEL2 přebywać a so doporučić. Łužiske liški su za swoje naslědne dźěło z młodymi hrajerjemi znate a poskića Leonej Jesslerej so w Běłej Wodźe dale wuwiwać. Swoje wukubłanje k wrotarjej dósta wón w Krefeldźe. W zašłym lěće steješe wón za Grefrather EG a EV Duisburg na lodźe.