Na šikwanym třistronskim burskim statoku na Róžeńčanskej čo. 36 w Pančicach-Kukowje bydlitej sotře Sabina a Katrin Pawlikec ze swójbomaj. Serbowce stej jón wot dźěda a wowki zdźědźiłoj. Z pomocu 100 000 eurow spěchowanskich srědkow programa LEADER – 25 procentow cyłkowneje sumy projekta – stej wonej bróžeń a pódlanski twar wonkownje awtentisce ­ponowić a sej nutřka bydleni wutwarić móh­łoj. Tež solarnu připrawu stej sej sotře instalować dałoj. Tykowaneho bydlenskeho domskeho z 18. lětstotka dla statok hižo dlěje pod pomnikoškitom steji. Iniciator a pilny pomocnik wobšěrneho twarskeho projekta běše nan sotrow, 71lětny Benedikt Pawlik. „Hač stare sćěny, wjerchi abo wokna, kotrež dyrbjachu so wutorhać, njesprócniwje je wón twarskim firmam z regiona twarnišćo přihotował, zo móžachu spěšnje a zaměrnje dźěłać“, tak sotře wuzběhnyštej. Wažne bě jimaj, zo historiski wonkowny napohlad – typiska forma třěchi, rozrjadowanje fasady abo forma ­woknow – wobeju twarjenjow zdźeržitej. Tež typiskej wukutaj (Nischen) za Marijinej postawje stej so wobchowałoj.