Hižo nazymu 2021 su w Chrósćicach z planowanjemi za lětuši wulki jubilejny swjedźeń składnostnje 800. róčnicy prěnjeho naspomnjenja wsy a wosady započinali. Swjedźenski tydźeń, kotryž běchu srjedu tydźenja zahajili, so nachila a móžemy z połnym prawom zwěsćić: Jara wotměnjawy a naročny program je publikum zahorił – wothłós je fulminantny! Mjeztym tež wěmy, zo je nimale 100 čestnohamtskich pomocnikow z Chrósćic a wokolnych wsow dźeń wote dnja k tomu přinošowało, zo móžachu hosćo njezapomnite wokomiki dožiwić. Wjeršk jubilejneho tydźenja běše bjezdwěla historiski swjedźenski ćah minjenu njedźelu, za kotrymž je wjace hač 600 sobuskutkowacych w 44 wobrazach stawizny a kulturne žiwjenje swojeje gmejny a wosady předstajiło.