W nowembru 2021 wotmě so wosrjedź koronapandemije w Choćebuzu zwjazkowe schadźowanje Swobodneho němskeho zwjazka awtorow (FDA). Hosćićel bě Braniborski krajny zwjazk FDA. Tři dny předstajichu so spisowaćeljo, kotřiž běchu so ze swojimi rozdźělnymi rukopisami z temu Łužica zaběrali. Wězo přewjedźechu w tym zwisku tež ekskursije do regiona, kotryž je – snano hišće bóle hač druhe wuchodoněmske kónčiny – w procesu ekstremneje změny.
W nakładnistwje Edition Märkische LebensArt je nětko antologija wušła, kotraž wuslědki Choćebuskeho schadźowanja zjima. Přetož kaž je hižo Johann Wolfgang von Goethe rjekł: „Štož čorne na běłym wobsedźiš, móžeš dobreje mysle sobu domoj wzać.“ Kniha ma wotewrjenej zhromadnosći a dorozumjenju ludźi w regionje polěkować, móže pak po mojim měnjenju tež ludźom po cyłej Němskej dohlad do wosebitosćow tudyšeje krajiny posrědkować.
