Tysacy dźiwich zwěrjatow kóžde lěto na dróhach Němskeje zahinu. Wosebite zelene mosty nad awtodróhami wšak maja jich žiwjenje škitać. Nětko pokazuja so prěnje wuspěchi.

Podstupim (dpa/SN). Nalěćo je čas, hdyž dźiwina přiběrajcy puće přeprěča, štož zas a zaso k njezbožam wjedźe. Wupuć z toho su wosebite mosty, kaž nazhonjenja w Braniborskej pokazuja. Zwěrina tajke mosty dźeń a bóle wužiwa. Ličba wobchadnych njezbožow z njej tam regionalnje woteběra, rozprawja dr. Kor­nelia Dobiáš, biologowka za dźiwje zwěrjata w krajnym lěsnym kompetencnym centrumje Eberswalde.

Něhdźe 50 metrow šěroke tak mjenowane zelene mosty wužiwaja přede- wšěm sorny, najčasćišo nad awtodróhu A 9 pola Niemegka njedaloko Podstupima. Tole je kompetencny centrum z pomocu infračerwjenych kamerow zwěsćił. Něhdźe 3 000 pohibow sornow po mosće su mjeztym zličili. Tamnej mostaj wjedźetej nad A 13 pola Tupca (Teupitz) we wokrjesu Dubja-Błóta a nad A 12 pola Briesena we wokrjesu Wódra-Sprjewja. Cyłkownje je dźiwina mjenowane tři mosty dohromady 6 150 króć wužiwała, zo by awtodróhu přeprěčiła.

6. meje přihotowachu so jednotki lěweho křidła 1. ukrainskeje fronty w Hornjej Łužicy na za přichodny dźeń přikazanu ofensiwu přećiwo wójsku Schörnera. Sowjets­ka 14. gardowa diwizija pěškow bě swoje stejnišća w Delanach wopušćiła a do zapadneho směra postupowała. Na jich městnje běchu pólscy wojacy 5. a 9. diwizije frontowu liniju mjez Rakecami, Jitkom, Nowoslicami, Ralbicami, Smjerdźacej a Čornowom přewzali. 7. a 8. pólska diwizija steještej mjez Zdźěrju, Minakałom, Drobami a Kaponicu hač před Njeswačidłom. Wottam měještej zwisk k pěškam 5. diwizije pola Jitka. Nalěwo wot 7. pólskeje diwizije bě 6. meje sowjetska 28. armeja pod komandom generalneho leutnanta Lučinskeho rum mjez Lěskej­ přez Dołhu Boršć hač ke Kwětanecam (Quitzdorf) a Wódrjeńcy (Ödernitz) wobsadźiła. Tale armeja bě do toho pola Gubina, hłownje pak přećiwo w kotole pola Halbe wobkruženym jednotkam Wehrmachty wojowała. Wot Wódrjeńcy hač do Lubanja běchu nětko sowjetscy wo­jacy 52. armeje koncentrowani.

Wohrěwace lampy za tři nopawy su w badensko-württembergskim Strau­ben­hardće wulkozasadźenje wohnjoweje wobory zawinili. Přećeženeho milino­woda dla bě so jedyn z kablow lampow w pincy domu zeškrěł a na syno kapał. Nastawaceho kura dla wołaše wobydlerka wohnjowu woboru, kotraž ze 54 lu­dźimi přijědźe. Mjeztym bě wobsedźer nopawow lampam milinu wotpinył. Jedna­ z nopawow so snadnje zrani.

Něhdyši zwjazkowy prezident Christian Wulff (55) a jeho mandźelska Bettina (41) bydlitaj zaso hromadźe. Tole zdźěli prawiznik Christiana Wulffa dźensa medijam. Dalše nadrobnosće nochcyše hla­dajo na priwatnu sferu potrjecheneju mjenować. Do toho bě bulwarny časopis Bunte wo tym rozprawjał. Wulffec mandźelskaj běštaj so lěta 2013 rozešłoj.

Nowy měšćanosta nastupi

Baršć (dpa/SN/ch). 25lětny Philipp Wesemann (SPD) stanje so z najmłódšim hłownohamtskim měšćanostu w Braniborskej. Dźensa wječor nastupi wón zastojnstwo w Baršću. W měrcu bě so laborant biologije w rozsudnych wólbach přećiwo kandidatej CDU Svenej Zuberej přesadźił. Dotalny měšćanosta Jürgen Goldschmidt (FDP) njebě strowotniskich přičin dla hižo kandidował. Baršć z ni­male 20 000 wobydlerjemi steji před wulkimi wužadanjemi. Wesemann chce swoje ródne město, kotrež swjeći lětsa 750. narodniny, w přichodnych wosom lětach na bydlenjahódne město wu­twarić. Za to chce předewšěm platowe twary z NDRskeho časa wotstronić.

Žadyn kónc stawka