Lube abonentki, lubi abonenća,

stupace kóšty w ćišćernjach tež Serbske Nowiny njewobeńdu. Za čas koronapandemije njebě połoženje nastupajo ćišćersku papjeru jenož přewšo napjate, jeje płaćizna je so runje toho­dla z městnami zwyšiła. Tymle wobstejnosćam so tež Ludowe nakładnistwo Domowina a redakcija Serbskich Nowin dlěje wuwinyć njemó­žetej.

Tohodla změja Serbske Nowiny wot 1. januara 2023 nowu płaćiznu. Lětny abonement za ćišćane wudaće płaći potom 79,20 eurow, abonement za digitalne wudaće 48,00 eurow, kombinowany abonement – ćišćana a digitalna wersija – 94,80 eurow a jednotliwe wudaće 0,50 eurow. Štóž jenož kónctydźenske wudaće w abonemenće čita, płaći na lěto 33,60 eurow, młodźinski abonement ćišćany a digitalny 36 eurow.

Prosymy wo zrozumjenje.

Ludowe nakładnistwo Domowina

Wodorunje: 3 alkoholiski napoj, 5 strašna wójnska bróń, 6 njefachowc, 7 něhdy braniborski knjejski splah, 10 zapopadnje žołmy, 13 wojowanja, 14 nic Serbowka, 15 město optiki w Durinskej

Padorunje: 1 šwedska skupina, 2 kónc modlitwy, 3 južny štom, 4 wojerske rozestajenje, 8 rěka w Francoskej, 9 žónske předmjeno, 11 demonstracija, 12 koparski klub w Madridźe

Ćiše z njebja sněh na zemju pada,

zakryje ju z běłym poslešćom.

Přiroda za wotpočinkom žada,

čłowjekej je z dobrym přikładom.

Lochce z njebja sněh na zemju pada,

ludźo honja sprócni po hasach.

Kóždy za lubosću pyta, hlada,

swjećić hody chce w zbóžnych začućach.

Měrnje z njebja sněh na zemju pada,

wójnu nochce žana wutroba.

Wujednać so měła kóžda zwada,

bože dźěćo z njebjes přichadźa.

Jěwa-Marja Čornakec