Krótkopowěsće (14.12.16)

Mittwoch, 14. Dezember 2016 geschrieben von:

Pjenjezy za sakske šule

Berlin/Drježdźany. Zwjazkowe knježerstwo je so dźensa w Berlinje na změnu financneho zrěčenja mjez krajemi a Zwjazkom dojednało. Zapřijaty do toho je tež program wo modernizowanju šulow. Tak móže Zwjazk přichodnje do kubłanišćow w gmejnach inwestować, kotrež nimaja trěbne pjenjezy. Dóńdźe-li k doskónčnemu rozsudej wo změnje, móže Sakska hižo klětu wot lěća 175 milionow eurow za šule nałožić.

Swobodny stat dale inwestuje

Drježdźany. Swobodny stat Sakska chce saněrowanje třoch šulow w Budyskim wokrjesu z cyłkownje 454 000 eurami podpěrać. Wjeselić móža so we Łutach, Zemicach-Tumicach a Radebergu. Tole zdźěli dźensa socialne ministerstwo w Drježdźanach. Pjenjezy su z inwesticiskeho programa „Mosty do přichoda“, z kotrymž hižo wot lěta 1990 infrastrukturne projekty spěchuja.

Dwórnišćowy mision 25 lět

Krótkopowěsće (13.12.16)

Dienstag, 13. Dezember 2016 geschrieben von:

Do zastojnstwa powołanej

Budyšin. Za nowu nawodnicu nutřkowneho serwisa krajnoradneho zarjada powoła Budyski wokrjesny sejmik wčera Franzisku Snelinski. Nowa hłownohamtska społnomócnjena za runo­stajenje wokrjesa budźe Ina Körner. Wona naslěduje Heidemarie Tröger, kotraž so kónc lěta na wuměnk poda.

Zhromadne powětrowe mocy

Praha/Bratislava. Čěska republika a Słowakska planujetej zhromadne zakitowanje powětroweho ruma. We wobłuku NATO unikatny projekt měł čěskim a słowakskim honjakam zmóžnić, tež nad teritorijom­ tamneho kraja lětać a jeho lětanišća­ abo kubłanske bazy wužiwać. W padźe potrjeby móhli sej tak powě­trowe mocy wobeju krajow pomhać.

Azylowy dom nadpadnyć chcyli

Krótkopowěsće (12.12.16)

Montag, 12. Dezember 2016 geschrieben von:

Proša wo rozmołwu

Budyšin. Iniciatiwna skupina Serbski sejm je so na cyłkownje 38 politisce zamołwitych­ Sakskeje, Braniborskeje a Zwjaz­ka wobroćiła a jich wo přeprošenje na rozmołwu prosyła. Po tym puću chcedźa politikarjam swój koncept za wutworjenje serbskeho parlamenta předstajić, w lisće rěka. Jedyn z adresatow je zwjazkowa kanclerka Angela Merkel (CDU).

ECMI wobsteji 20 lět

Flensburg. Europski centrum za prašenja mjeńšin (ECMI) je tele dny 20. róčnicu swojeho wobstaća woswjećił. Na swjedźenskim zarjadowanju w Flensburgu wobdźěli so tež społnomócnjeny zwjazkoweho knježerstwa za prašenja mjeńšin Hartmut Koschyk (CSU), kaž ze zdźělenki ECMI wuchadźa. Knježerstwa Danskeje, Němskeje a Schleswigsko-Holsteinskeje běchu ECMI 1996 załožili.

Witataj kandidaturu Serbowki

Krótkopowěsće (09.12.16)

Freitag, 09. Dezember 2016 geschrieben von:

Twarc bombow zajaty

Drježdźany. Dwaj a poł měsaca po bombowymaj nadpadomaj na mošeju a na kongresowy centrum w Drježdźanach je policija 29lětneho podhladneho z Drježdźan zajała. Při přepytowanjach namakachu zastojnicy maćizny, kotrež so za twar bombow hodźa, kaž statne rěčnistwo dźensa zdźěli. Na městnomaj njeskutka namakany genetiski material a DNA pohladneho so kryjetej.

Konkretne ličby njepředleža

Budyšin. Koncern Bombardier chce po informacijach nowiny Handelsblatt jasnje wjac dźěłowych městnow šmórać, hač je dotal znate: 2 500 po wšej Němskej, mjez druhim w Budyšinje, Zhorjelcu a Hennigsdorfje. Konkretne Ličby njeje koncern dotal wozjewił. Dźěłarnistwo IG metal chce přichodny štwórtk w Budyšinje přećiwo tomu protestować.

Masowy doping w Ruskej

Krótkopowěsće (08.12.16)

Donnerstag, 08. Dezember 2016 geschrieben von:

Komuny namołwjene

Drježdźany. Sakski zličbowanski zarjad namołwja komuny swobodneho stata ke krutej etatowej disciplinje. Prezident zarjada Karl-Heinz Binus je na předstajenju najnowšeje lětneje rozprawy kritizował, zo komuny swój dołh přiběrajcy z jadroweho etata wurjaduja a na přikład swójske komunalne zawody załožeja. Tajke pak su ćežko kontrolujomne.

Čakaja na informacije

Zhorjelc/Budyšin. Dźěłarnistwo IG metal wočakuje spočatk přichodneho tydźenja jasne informacije ze stron koncerna Bombardier wo planowanych změnach we wuchodoněmskich twornjach. Dźensa je so po informacijach dźěłarnistwa dohladowanska rada koncerna schadźowała. Za tydźeń planuja protestnu akciju přećiwo šmórnjenju městnow.

Wójnski schow namakali

Krótkopowěsće (07.12.16)

Mittwoch, 07. Dezember 2016 geschrieben von:

Ludźi zaso domoj wabić

Budyšin. Wjacore wokrjesy w Sakskej chcedźa hodowne prózdniny wužiwać, zo bychu ludźi, kotřiž su dźěła dla do druhich zwjazkowych krajow wotešli, pohnuli­ so zaso do swojeje domizny wróćić. Tak chcedźa nowych fachowcow nawabić. W Budyšinje je tajka akcija 27. decembra planowana.

„Mudre lampy“ instalowane

Praha. Jako wobstatk nadróžneho wobswětlenja w čěskej stolicy su prěnje tři „mudre lampy“ instalowali. Jich stołpy skića nimo swěcy wjacore přidatne posłužby, kaž kontakt k wuchowanskemu systemej, měrjenje zanjerodźenja powětra abo móžnosć znowanabiwanja elektrojězdźidłow. Wokoło stołpa je tež spěšny internetny zwisk móžny.

Pola Amazon zaso stawkuja

Lipsk. Noweho stawka pola wulkowikowarja Amazon w Lipsku dla hroža nětko do hód zapozdźenja při rozwožowanju hodownych pakćikow, kaž rěčnik dźěłarnistwa ver.di dźensa připowědźi. Rano je po jeho informacijach něhdźe 200 sobudźěłaćerjow dźěło złožiło. Při­stajeni žadaja sej wyši hodowny pjenjez, znajmjeńša tysac eurow. Amazon płaći jim runje 400 eurow.

Krótkopowěsće (06.12.16)

Dienstag, 06. Dezember 2016 geschrieben von:

Tilich za wotsunjenje

Drježdźany. Sakski ministerski prezident Stanisław Tilich (CDU) je so za to wuprajił, kriminelnych młodostnych požadarjow azyla do jich domizny wróćo pósłać, hdyž su wina na ćežkim njeskutku. Pozadk je pad wumocowaneje a morjeneje studentki w badensko-württembergskim Freiburgu. Njeskutka podhladny je 17lětny ćěkanc z Afghanistana.

PISA: Němska lětsa špatniša

Berlin. Němska je so w mjezynarodnym přirunowanju šulerskich wukonow „Pisa 2015“ pohubjeńšiła, wosta pak w prěnjej třećinje najlěpšich krajow organizacije OECD. 15lětni šulerjo mějachu při najnowšim přepytowanju w přirodowědnych přemjetach a w matematice špatniše wuslědki hač loni. Porno tomu su so w čitanju snadnje polěpšili, kaž dźensa z Berlina zdźělichu.

Wopačna powěsć rozbudźa

Krótkopowěsće (05.12.16)

Montag, 05. Dezember 2016 geschrieben von:

Milan Hrabal z nowostki čitał

Praha. Składnostnje stotych narodnin Jurja Brězana čitaše Varnsdorfski spisowaćel Milan Hrabal sobotu w Praskim Serbskim seminarje ze swojeje nowostki „Přiběhy o vodě“. Zakład knihi je němskorěčna publikacija Brězana „Geschichten vom Wasser“, kotruž bě wón zhromadnje z nawodnicu Varnsdorfskeje biblioteki Ilonu Martinovskej přełožił.

Basnje wo słowjanskim herbstwje

Neustadt an der Orla. Publicist dr. Baal Müller z Treuenbrietzena je pod hesłom „Wendische Fahrt“ basnje wo słowjanskim herbstwje wozjewił. Jedyn kapitl knihi, kotruž je nakładnistwo Arnshaugk w Neustadće an der Orla wudało, wěnuje so tež Łužicy. Baal Müller angažuje so na polu słowjanskeho pohanstwa.

Šiman za razniše kontrole

Budyšin. Zapósłanc CDU w Sakskim krajnym sejmje Marko Šiman žada sej hnydomne naprawy přećiwo organizowanym cwólbam, kotrež ludźi ilegalnje do Europy pašuja. Tak měli so po wšej Europje zaso pomjezne kontrole dołhodobnje zawjesć. „Njemóžemy so na Schengenski rum spušćeć“, rěka w pjatk wozjewjenej zdźělence Šimana.

Krótkopowěsće (02.12.16)

Freitag, 02. Dezember 2016 geschrieben von:

Z Merkel diskutować

Jena. Zwjazkowu kanclerku Angelu Merkel (CDU) wočakuja dźensa wječor w Jenje. Tam chce wona na regionalnej konferency z čłonami CDU Durinskeje, Sakskeje, Saksko-Anhaltskeje, Braniborskeje a Berlina wo aktualnych politiskich temach wuradźować. Při tym póńdźe tež wo politiku ćěkancam napřećo a wo rentu. Wočakuja sta wobdźělnikow, ale tež přećiwnych demonstrantow.

Hosćenc „Juwel“ wuznamjenjeny

Korzym. Hosćencej „Juwel“ w Korzymje su požadanu „hwězdu“ spožčili a dom zdobom do lisćiny wusahowacych gurmejowych hosćencow „Guide Michelin“ 2017 přiwzali. Dom z kuchinskim šefom Philippom Liebischom na čole je prěni počesćeny hosćenc w Sakskej, kotryž je zwonka wulkoměstow. Fachowcy wuznamjenichu 292 hosćencow kraja.

Wjace piwa eksportowali

Krótkopowěsće (01.12.16)

Donnerstag, 01. Dezember 2016 geschrieben von:

Mortwej wjelkaj w Braniborskej

Kopańce. W južnej Braniborskej su mortwej wjelkaj našli. Wutoru bě hajnik na wotžnjatym polu pola Žargonja (Sergen) we wokrjesu Sprjewja-Nysa wjelka našoł, kotryž tam hižo něšto dnjow ležeše. Jeho organy běchu hižo wužrane. Pola Krynicy we wokrjesu Łobjo-Halštrow bě wjelk po zražce z awtom zahinył. Wobě zwěrjeći nětko w instituće přepytuja.

Sakska w geotermiji wodźaca

Drježdźany. Při wužiwanju zemskeje ćopłoty je Sakska po wšej Němskej wodźaca. Loni su dalše 3 376 kilowattow energije přizamknyli. Hladajo na woby­dlerstwo je to najwjetši cyłozwjazkowy rozrost, wobswětowe ministerstwo informuje. Na druhim a třećim městnje slědujetej Bayerska a Braniborska. Kraj wužiwanje geotermije spěchuje.

Tójšto njezbožow sněha dla

słowo lěta 2020

Anzeige