Krótkopowěsće (08.05.17)
Domjacnosće maja wjac pjenjez
Kamjenc. Wobydlerjo Sakskeje mějachu lěta 2015 přerěznje 18 691 eurow za přetrjebu a lutowanje k dispoziciji. To bě 461 eurow (2,5 proc.) wjace hač lěto do toho. Přiwšěm su ludźo w swobodnym staće hišće 2 900 eurow wot cyłoněmskeho přerězka zdaleni. Tón wučinja 21 580 eurow. Lońše ličby hišće njepředleža.
Chowaja smjertne powostanki
Seelow. Pod dohladom sobudźěłaćerjow ruskeho wulkopósłanstwa su dźensa započeli, masowy row sowjetskich wojakow při zwjazkowej dróze B 1 pola Seelowa rumować. Dotal su smjertne powostanki 21 wojakow namakali, kaž Ludowy zwjazk staraćelstwa wo němske wójnske rowy zdźěla. Rozměr rowa dotal hišće njepřewidźa. Wojacy běchu tam při ćežkich bitwach 1945 padnyli.
Truty za čěsku policiju
Praha. Čěske knježerstwo je nowe směrnicy za natwar wosebiteje policajskeje jednotki schwaliło, kotraž ma truty (Drohne) wužiwać. W běhu přichodneju lět měli zakłady za nje w štyrjoch městach kraja nastać. Policija planuje tež škit před trutami polěpšić, na přikład Praski hród jako sydło prezidenta.
Budyšanam jasnje podleželi
Krótkopowěsće (05.05.17)
„Serbske powěsće“ znowa wušli
Budyšin. Po prěnim wudaću „Serbskich powěsćow“ w lěće 1959, kotrež wopřijima wjele znatych a mjenje znatych bajow, je w LND nětko třeći, přehladany nakład woblubowaneje knihi z rysowankami Měrćina Nowaka-Njechorńskeho wušoł. Zběrka chce pomhać znatosć wódneho muža, lutkow, wurlawow, Pumpota a dalšich postawow wobchować a je přichodnym generacijam zbližić.
Wot jutřišeho su meje widźeć
Chrósćicy. Za wubědźowanje župy „Michał Hórnik“ wo najrjeńšu meju je dotal dwanaće wobrazow dóšło, mjez druhim z Konjec, Wotrowa a Serbskich Pazlic, zdźěli regionalna rěčnica Katharina Jurkowa. Wone budu wot jutřišeho na Facebookowej stronje župy widźeć. Hač do 15. meje móžeće potom wo najrjeńšej meji wothłosować. Dobyćer dóstanje nimo serbskeje chorhoje sud piwa.
Předewzaćeljo maja wolić
Krótkopowěsće (04.05.17)
Wjace pjenjez do šulow
Drježdźany. Sakske šule dóstanu w šulskim lěće 2017/2018 něhdźe 26 milionow eurow za cyłodnjowske poskitki. To přesahuje poskitk w aktualnym šulskim lěće wo wjace hač tři miliony. Něhdźe 304 000 šulerjow a tak 6 000 wjace změje z toho wužitk. W přichodnych tydźenjach dóstanje 1 278 šulow informaciju wo spěchowanju.
Heinz Keßler zemrěł
Berlin. Něhdyši zakitowanski minister NDR Heinz Keßler je njeboh. Armejowy general je zawčerawšim, wutoru, 97lětny w Berlinje zemrěł, kaž tamniše medije rozprawjeja. Keßler steješe wot lěta 1985 hač k wotstupej 1989 na čole zakitowanskeho ministerstwa. Zdobom bě wón čłon politběrowa SED. Berlinsku murju a socializm je hač do kónca zakitował.
Łužiske hory zwičnić
Nový Bor. Zwjazk gmejnow w čěskich Łužiskich horach je předstajił plany, kak kónčinu turistisce zwičnić. Dotal skerje pozabyty region ma wulki přirodny kaž tež kulturny potencial. Marketingowe pomjenowanje „Łužiske hory“ ma při tym centralne městno měć. Projekt wopřijima tež sobudźěło z organizacijemi w němskich Žitawskich horinach.
Higuain dwójce trjechił
Krótkopowěsće (03.05.17)
Twarja nowu wobjězdku
Wojerecy. Ze symboliskim prěnim zarywom su dźensa wuchodnje Wojerec nowu wobjězdku wokoło města twarić započeli. Nimale sydom kilometrow dołha čara, kotraž powjedźe wot B 96 pola Mučowa hač k B 97 sewjerowuchodnje Wojerec, ma Ćisk, Němcy a Wojerecy wot wobchada wolóžić. Wobjězdka płaći 20 milionow eurow a ma w lěću 2019 hotowa być.
Lětopis lyriki 2017 z Chěžku
Frankfurt am Main. W nowej knize „Jahrbuch der Lyrik 2017“ je tež baseń „Zelene zet“ Jurja Chěžki zapřijata. Róža Domašcyna bě ju do němčiny přenjesła. Jeje poezija jewi so tež w 31. wudaću lětopisa z načasnej lyriku Němskeje, Awstriskeje a Šwicarskeje, kotryž wuńdźe lětsa prěni raz w Frankfurtskim nakładnistwje Schöffling & Co.
Nowy młodźinski dušepastyr
Drježdźany. Kapłan Martin Kochalski budźe nowy młodźinski dušepastyr Drježdźansko-Mišnjanskeho biskopstwa. 36lětny, kotrehož je biskop Heinrich Timmerevers do zastojnstwa powołał, nastupi 1. awgusta swoju słužbu, kaž biskopski ordinariat w Drježdźanach zdźěla. Kochalski pochadźa z Lipska a bě po swjećiznje 2012 kapłan w Šěrachowje.
Krótkopowěsće (02.05.17)
Tilich we Łužicy po puću
Žitawa/Biskopicy. Nutřkowna wěstota bě hłowna tema dźensnišeho wopyta sakskeho ministerskeho prezidenta Stanisława Tilicha (CDU) w Budyskim a Zhorjelskim wokrjesu. Tak rěčeše wón mjez druhim ze Žitawskimi wohnjowymi wobornikami wo mjezy přesahowacym zhromadnym dźěle. W Budyšinje wopyta Tilich kubłanski centrum policije. Wječor je wobydlerski forum w Biskopicach.
Lay na dobrym třećim městnje
Glauchau. Budyska zapósłanča Lěwicy w zwjazkowym sejmje Caren Lay steji na 3. městnje krajneje lisćiny swojeje strony k wólbam zwjazkoweho sejma w septembru. Wona móžeše so na krajnym zjězdźe w Glauchauwje w rozsudnych wólbach přesadźić. Na prěnje a 2. městno wuzwolichu delegaća předsydku strony Katju Kipping a Andréja Hahna.
Park wětrnikow nastanje
Krótkopowěsće (28.04.17)
Wutoru započnu twarić
Pančicy-Kukow. Statnu dróhu S 100 w Pančicach-Kukowje započnu přichodnu wutoru, 2. meje, wutwarjeć, zdźěli krajny zarjad za dróhotwar a wobchad. Runočasnje nastanje nowy móst nad Klóšterskej wodu. W tym zwisku maja so wodowody, milinowody, wopłóčkowe kanale a dalše nošerje medijow přepołožić. Dźěła maja hač do lěća 2018 trać. Tak dołho budźe S 100 dospołnje zawrjena.
Namołwja k demonstraciji
Drježdźany. Předsyda sakskeje SPD, hospodarski minister Martin Dulig, namołwja ludźi so 1. meje na zarjadowanjach dźěłarnistwow wobdźělić. Za lěpše dźěłowe wuměnjenja dyrbjeli socialdemokraća a dźěłarnistwa za samsny postronk ćahnyć, rjekny wón w Drježdźanach. Zdobom sej wot předewzaćow žada, wjace na dobro dźěławych činić.
Němska rěč prašana
Krótkopowěsće (27.04.17)
Peticiju zapodali
Podstupim. Peticiju nastupajo planowanu změnu postajenja za wučbu serbšćiny je Domowina wčera peticiskemu wuběrkej Krajneho sejma Braniborskeje zapodała. Peticija wopřijima lisćinu, kotruž je 2 249 wosobow z tu- a wukraja podpisało. Připołožena je online-peticija staršiskeje iniciatiwy z wjace hač 20 000 podpismami hač do 17. apryla.
Olympiada zakónčena
Wodowe Hendrichecy. Sarah Hančikec, šulerka Budyskeho Serbskeho gymnazija, Daniel Šołta z Wojerowskeho Johanneuma a Leonard Nowack ze Žylowskeje zakładneje šule su lětušu 51. olympiadu serbskeje rěče jako najlěpši zakónčili. Wšitcy třo docpěchu we wobłuku třidnjowskeho wubědźowanja we Wodowych Hendrichecach wukon „z wuznamjenjenjom“.
Ponowja přezmjeznu železnicu
Karlovy Vary. W zapadnej Čěskej chcedźa lokalnu přezmjeznu železnisku čaru, zwjazowacu kupjele Karlovy Vary ze sakskim Johanngeorgenstadtom, hač do julija 2018 dospołnje ponowić. Po zakónčenju projekta w hódnoće 17 milionow eurow budźe jězba po 45 kilometrow dołhej trasy po Rudnych horinach potom sydom mjeńšin spěšniša.
Krótkopowěsće (26.04.17)
WiL z nowym předsydstwom
Choćebuz. Łužiska hospodarska iniciatiwa (WiL) ma nowe předsydstwo. Předsyda jednaćelstwa předewzaća BASF Schwarzheide Jürgen Fuchs bu do nawodnistwa wuzwoleny. Bywšeho jednaćela WiL dr. Huberta Lerchu su rozžohnowali. Wón poda so na wuměnk. Jeho zastojnstwo přewozmje nětko Michael Schulz, kiž bě wot januara hižo zastupowacy jednaćel WiL.
Pruwowanje derje wobstali
Wojerecy. Wojerowska turistiska informacija je znowa kwalitne pruwowanje „marki i“ wobstała a dósta samo wuznamjenjenje „serwis kwalita Němska“. Cyłkownje 40 kriterijow bu bjez wědźenja přistajenych přepruwowanych. Wosebje přeswědčiłoj stej fachowcow němskeho turistiskeho zwjazka wonkowny wobraz a nowowuhotowana informacija.
Prózdniny po němskim mustrje?
Krótkopowěsće (25.04.17)
Najrjeńše jejka wuzwolili
Budyšin. Mjez 35 kolekcijemi jednotliwcow w starobje štyrjoch do 25 lět a 92 kolekcijemi 2. do 4. lětnika Kulowskeje Krabatoweje šule je jury Spěchowanskeho kruha za serbsku ludowu kulturu wčera najrjeńše serbske jutrowne jejka dorosta wuzwoliła. Spěchowanske myto dóstanje 16lětna Sophie Hejduškec z Noweho Łusča. Dobyćerske kolekcije wustaja nětko w Budyskej SKI.
Mytuja twarske projekty
Drježdźany. Sakska pyta za najrjeńšim domom we wjesnych kónčinach. Hač do 15. meje móža priwatnicy, předewzaćeljo a komunalni twarcy kaž tež architekća a inženjerojo swoje projekty za krajne wubědźowanje „Twarić we wjesnych kónčinach“ zapodać. Wuznamjenić chcedźa přikładnje ponowjene twarjenja runje tak kaž dospołnje nowe.
Wjace potrěbnych doma hladaja
Kamjenc. Lěta 2015 su w Sakskej 117 677 hladanja potrěbnych doma zastarowali. To bě 14 725 wjace hač 2014. Wo wjace hač połojcu potrěbnych starachu so swójbni abo přećeljo, za čož dóstachu hladanski pjenjez. Něhdźe 50 000 ludźi trjebaše ambulantnu słužbu, zdźěla statistiski krajny zarjad w Kamjencu.
Krótkopowěsće (24.04.17)
W rozmołwje z wobydlerjemi
Plauen. Sakski ministerski prezident Stanisław Tilich (CDU) zahaji dźensa wječor w Plauenje swoju rozmołwnu turu. K zahajenju chce so wón pod hesłom „Zhromadnje w Sakskej – za sylny přichod“ z Plauenskimi wobydlerjemi zetkać. Sto ludźi je so za to přizjewiło. Tilich planuje pjeć zarjadowanjow. Přichodne budźe 2. meje w Biskopicach.
Nadpady na stronske běrowy
Lipsk. Politikarjo a běrowy zapósłancow su dale cil nadpadow, byrnjež ličba atakow woteběrała. Lěwica je w prěnim kwartalu pjeć nadpadow zličiła. Prěnje tři měsacy 2016 bě jich hišće 22. AfD rozprawja wo nadpadomaj na běrow w Budyšinje a Zhorjelcu. Tež SPD a CDU stej tajke nadpady registrowałoj.
Tójšto wobdźělnikow
Bórkowy. Wjace hač 12 200 sportowcow je so na kónctydźenskim 15. błótowskim marathonje w Bórkowach, Lubnjowje, Lubinje a Tšupcu wobdźěliło. To je 300 wjace hač loni, kaž zarjadowarjo zdźěleja. Z wjace hač 1 300 wobdźělnikami bě 200 kilometrow dołha kolesowarska čara najbóle prašana.
Boll němske finale dobył
