Krótkopowěsće (28.09.23)
Wjetšina pře nowy móst
Budyšin. Wothłosowanje wo planowanym nowym mosće za pěškow nad Sprjewju w Budyšinje je zakónčene. Snadna wjetšina 56 procentow dohromady něhdźe 5 500 wothłosowacych projekt wotpokaza. Woprašowanje njeje reprezentatiwne a tuž njezawjazowace, ma pak „Budyskej měšćanskej radźe nastupajo rozsud wo twarje pomhać“.
Do wuchodneje Belgiskeje
Njebjelčicy/Brüssel. Pod temu „Wot Europy a regionow wuknyć“ je so dźensa rano 28 čłonow Serbskeho sejma kaž tež dalši zajimcy z busom na štyridnjowsku ekskursiju do Brüssela a k Němskemu zhromadźenstwu we wuchodnej Belgiskej podało. Program je Załožba Slavonic Europe zestajała. Tak planuja za jutře zetkanje z prezidentom wuchodobelgiskeho parlamenta, Charlesom Servatym.
Natwarja wosebitu powjaznicu?
Krótkopowěsće (27.09.23)
Maja spěšnišo jednać
Podstupim. Braniborske krajne knježerstwo je wčera wobzamknyło, zo maja šule w přichodźe spěšnišo w padźe ekstremizma jednać. Tak přihłosowaše kabinet naćiskej noweho šulskeho zakonja. We wotpowědnym paragrafje rěka, zo měli so pady ekstremistiskeho, antisemitiskeho abo rasistiskeho zadźerženja hnydom šulskemu zarjadej zdźělić.
Stipendijej přijimałoj
Budyšin. Lětušej stipendiatce Mättigoweje załožby staj minjenu njedźelu w Budyskej cyrkwi swj. Pětra šekaj po stajnje 1 200 eurach přijimałoj. Corneliji Müller ze Zhorjelca přiznachu spěchowanje za zdźuěłanje swojeje promocije wo hašenju wohenja w Hornjej Łužicy w 18. a 19. lětstotku a Drježdźanjance Lisy Hallex za spisanje masterskeho dźěła wo hajenju parka w Mohornje (Ohorn) pod aspektom pomnikoškita.
Zaso doma produkować
Krótkopowěsće (26.09.23)
Swjatk rěče po cyłej Europje
Straßburg/ Brüssel. Po cyłej Europskej uniji swjeća dźensa Europski dźeń rěče. Wot lěta 2001 zarjaduje Europska rada w Straßburgu zhromadnje z EU wony swjatk. Lětsa so na nim mjez druhim tež Federalistiska unija europskich narodnych mjeńšin (FUEN) wobdźěli. Tuta přepodadźa dźensa 50 słownikow mjeńšinowych a regionalnych rěčow Muzejej za europske stawizny w Brüsselu.
Žadaja sej přechodnu płaćiznu
Budyšin. Dźěłarnistwo IG metal zasadźa so za to, płaćiznu za milinu na wěsty čas wobmjezować. Płaćić měł tónle „mosćik“ za industrijne zawody. Tuchwilu přewjedźe IG metal w zawodach akciski tydźeń. Před wrotami so wobdźělacych zawodow su zjawne zarjadowanja, hdźež přistajeni swoje žadanje za „mosćikowej milinowej płaćiznu“ wobkruća.
„Keltiske“ piwo nawarili
Krótkopowěsće (25.09.23)
Pawk z nowym předsydu
Budyšin. Radworčan Lukaš Pěčak je nowy předsyda młodźinskeho towarstwa Pawk. Jeho su čłonojo sobotu na hłownej wólbnej zhromadźiznje wolili. Wón naslěduje Jakuba Wowčerja, kotryž je towarstwo štyri lět nawjedował. Verena Suchec je nowa pokładnica, kotraž naslěduje Fabiana Šěraka. Klětušej wjerškaj stej Jutrowny seminar MENS w Budyšinje a 30lětne wobstaće towarstwa.
Dóstanu wjace mzdy
Choćebuz. Koncern Łužiska energija a milinarnje (LEAG) płaći swojim sobudźěłaćerjam wot 1. decembra wjace mzdy. Tole zdźěli zawčerawšim industrijne dźěłarnistwo IGBCE. Tak dóstanu přistajeni předewzaća sydom procentow wjace, znajmjeńša dyrbjało to 240 eurow być. Nimo toho dóstanu čłonojo IGBCE w oktobrje přiražku we wobjimje 6 000 eurow.
Ochranowske sydlišća do lisćiny
Krótkopowěsće (22.09.23)
Dalše zetkanje phōnē
Santiago de Compostela. Intendant Němsko-Serbskeho ludoweho dźiwadła, Lutz Hillmann, a zamołwita za serbske dźiwadło, Madleńka Šołčic, podaštaj so dźensa na dalšu konferencu w zwisku z projektom phōnē w Španiskej. W galiciskim měsće Santiago de Compostela wuměnjeja sej zamołwići a režiserojo mjeńšinoweho dźiwadła.
Přikrótši jězbny plan za liniju S8
Kamjenc. Zastupjerjo Němskeje železnicy kaž tež wobchadneho zwjazka VVO su so srjedu w Kamjencu z měšćanskimi radźićelemi zetkali, zo bychu wo rozrisanju kopicy ćežow na železniskej čarje mjez Kamjencom a Drježdźanami (S8) diskutowali. Z nowym jězbnym planom z jasnje mjenje zwiskami wot oktobra sem chce Němska železnica problem rozrisać.
Dilema wokoło wulkopósłanca
Krótkopowěsće (21.09.23)
Přidatne srědki komunam
Drježdźany. Sakski krajny sejm je wčera puć runał na dobro wokrjesow a komunow, kotrež su wot bytostneho zwyšenja kóštow potrjechene. Wjetšina zapósłancow je trěbnu změnu zakonjow za komunalne financne wurunanje schwaliła. Tak přewostaji Sakska wokrjesam a komunam hišće lětsa nimale 133 milionow eurow za jich nadawki w zwisku z wójnu Ruskeje w Ukrainje.
Wotchadna jězba do Prahi
Praha. Šulerjo 10. lětnika Worklečanskeje wyšeje šule „Michał Hórnik“ přebywaja z rjadowniskej wučerku Katku Bukowej tuchwilu w Praze. Na zakónčacej jězbje su sej mjez druhim Hradčany z cyrkwju swj. Wita wobhladali kaž tež na Karlowym mosće a při Praskim Jězusdźěćatku pobyli. Dźensa je jich Danko Handrik do studija ARD w Praze přeprosył.
Historiska wěža na předań
Krótkopowěsće (20.09.23)
17 namjetow mytowanych
Budyšin. W lětušim wubědźowanju idejow „Rěč zwjazuje. Rěc zwězujo. Sorbisch verbindet“ je jury 17 namjetow mytowała. Kaž Załožba za serbski lud wčera zdźěli, je hač do 25. julija 50 požadanjow dóšło. Mytowanske zarjadowanje budźe 17. nowembra w Budyšinje. Tam zhonja wuznamjenjeni tež wo wysokosći swojeho myta. Přehlad mytowanych namakaće pod .
Wuwzaćna dowolnosć móžna
Drježdźany. Sakska wuwólnja dotalny zakaz w boju přećiwo afriskej swinjacej mrětwje. W postajenym zawrjenym pasmje II, to je najbóle wohrožena kónčina, móža plahowarjo pod wěstymi wuměnjenjemi wuwzaćnu dowolnosć dóstać, zo bychu domjace swinje pod hołym njebjom plahowali. Krajna direkcija Sakskeje je za to płaćiwy powšitkowny wukaz wotpowědnje změniła.
Chmjelarstwo w zapisu UNESCO
Krótkopowěsće (19.09.23)
Znowa wo elektrifikaciji rěčeli
Berlin. Wospjet zetkachu so zastupjerjo łužiskeje politiki wčera w zwjazkowym ministerstwje za wobchad, zo bychu wo dalšim postupowanju při elektrifikaciji čary Drježdźany–Zhorjelc wuradźowali. Konkretne wuslědki drje přeco hišće njepředleža, ale politikarjo, mjez nimi Budyski krajny rada Udo Wićaz (CDU) , su so na dalši časowy plan dojednali. Z rozsudom liča w nalěću 2024.
Z čahom po cyłej Europje
Drježdźany. Druhi raz wulosuje sakske ministerstwo za Europu lětsa tikety za tak mjenowany „Program Interrail“ pod titulom #saxorail. Z tutymi zmóžnja młodym dorosćenym w starobje 18 do 27 lět sydom dnjow dołho bjezpłatnje na wosebitych čarach po cyłej Europje jězdźić. W horncu maja lětsa 700 tiketow, wo kotrež móža so zajimcy online hišće hač do 15. oktobra požadać.
Syły Čechow na Dnjach NATO
Krótkopowěsće (18.09.23)
Přećiwo wuswojenju lěsa
Freiberg. Sakski wyši hórnistwowy zarjad w Freibergu je dźensa wo wuswojenju priwatneho lěsa blisko Rownoho za Wochožansku jamu jednało. Mějićeljo a Zelena liga jako najenk přećiwjataj so předani woneje połhektarskeje přestrjenje LEAG. Wažny argument přećiwnikow je, zo wot 2026 žadyn wobkrućeny ramikowy zawodny plan jako zakład móžneho wuswojenja njepředleži.
Hornjołužiska firma w Gdańsku
Drježdźany/Gdańsk. Sakski know-how na kolije wjazanu mobilitu nastupajo steji w srjedźišću mjezynarodnych wikow železniskeje techniki TRAKO wot jutřišeho hač do pjatka w pólskim Gdańsku. Na zhromadnym stejnišću z Clusterom za železnisku techniku Rail.S a z Hospodarskim spěchowanjom Sakskeje je mjez dźesać předewzaćemi tež firma Lakowa z Wjelećina zastupjena.
Tarifowy konflikt so přiwótřa
Krótkopowěsće (15.09.23)
Sprjewiny móst njepodpěruje
Budyšin. Budyski wyši měšćanosta Karsten Vogt (CDU) nochce hladajo na jasny wotum ludnosće přećiwo natwarej noweho Sprjewineho mosta projekt w nětčišej formje podpěrować. „Dwě třećinje přećiwnych hłosow wot dohromady 7 000 wobdźělnikow na wšitkich naprašowanjach njemóžu prosće ignorować“, wón praji. Poziciju je měšćanskej radźe zdźělił, kiž w oktobrje wo projekće wothłosuje.
Nowej ediciji z LND
Budyšin. Knižna Protyka 2024 a Wšědne hesła Ochranowskeje bratrowskeje wosady, kotrež su w serbskej rěči zhromadny wudźěłk ze Serbskim ewangelskim towarstwom, stej jako nowej ediciji w Ludowym nakładnistwje Domowina (LND) wušłoj. W srjedźišću protyki steja křižerjo, knižna premjera budźe 19. oktobra w Starym dwórnišću w Radworju.
Jendźelšćinu jako prěnju cuzu rěč
