Krótkopowěsće (23.11.16)
Krabat jako app wuspytać
Budyšin. „Krabat a potajnstwo serbskeho krala, 1. staw“ předleži wotnětka jako pospytna wersija dyrdomdejskeje kompjuteroweje hry jako app za mobilne nastroje, kaž tablet abo smartphone. Projektna skupina „Rapaki“ je ju w nadawku Załožby za serbski lud wuwiła. Putaca stawizna jedna 1714. Kompletna werzija ma klětu dozhotowjena być.
Šulerskej filmaj dobyłoj
Wojerecy. Hnydom dwójce su Wojerowsku kulturnu fabriku na Festiwalu sakskeho šulerskeho filma wuznamjenili. Prěnje myto dobychu šulerjo 4. lětnika dźěćaceho domu „Při Halštrowskim wobłuku “z projektom „Pućowacy złotak“. 10. lětnik Lessingoweho gymnazija dósta za swój film „Město“, kotryž je zhromadnje z kulturnej fabriku zhotowił, druhe myto.
Nowy předsyda towarstwa
Budyšin. Budyšan Andreas von Geibler je nowy předsyda towarstwa Willkommen in Bautzen. Čłonojo předsydstwa su jeho wuzwolili, po tym zo bě prěni a dotalny předsyda loni załoženeho towarstwa Sven Scheidemantel hižo w oktobrje zastojnstwo złožił. Zdobom je wón tež z towarstwa wustupił.
BVB wosom króć trjechił
Krótkopowěsće (22.11.16)
Ptača gripa so rozpřestrěwa
Drježdźany. Ptača gripa so dale rozpřestrěwa a je mjeztym saksku krajnu stolicu docpěła. Pola dźiwjeje kački, kotruž běchu mortwu při jězoru w Birkwitzu-Pratzschwitzu pola Drježdźan našli, zwěsćichu strašny wirus H5N8, kaž zamołwići z Drježdźan zdźěleja. Mjeztym zarjadowanje wěstotne pasmo nětko je tež psam a kóčkam zakazane.
Wuradźuja wo digitalizaciji
Lipsk. Drobna hospodarska struktura we wuchodnej Němskej je jedyn z hłownych zadźěwkow při dalewuwiću digitalizacije. Najwjetši dźěl swójbnych předewzaćow je z politiskich přičin w prěnjej generaciji a ma mjenje hač 20 přistajenych, zdźěli prezident Zwjazka swójbnych předewzaćelow. W Lipsku wuradźuje dźensa 250 wobdźělnikow wo nowych wuwićach w swójbnych firmach.
Hanjenje prezidenta pochłostać?
Krótkopowěsće (21.11.16)
Počesća Gertrud Wincarjowu
Drježdźany. Sakski ministerski prezident Stanisław Tilich (CDU) přepoda zajutřišim, srjedu, 13 zasłužbnym wobydlerjam Sakskeje Zasłužbny rjad zwjazkoweje republiki. Mjez počesćenymi je tež Gertrud Wincarjowa z Čorneho Chołmca. 75lětna ma wusahowace zasłužby na nastaću tamnišeho Krabatoweho młyna, kaž sakske knježerstwo zdźěla.
Ptača gripa so rozšěrja
Greifswald. Ptača gripa so w Němskej dale rozšěrja. Wulce natykliwy wirus H5N8 su po informacijach Friedricha Loeffleroweho instituta na kupje Riems mjeztym pola dźiwich ptačkow w jědnaće zwjazkowych krajach zwěsćili. Rozšěrjenje wirusa stawa so tuchwilu „z wulkej dynamiku“, institut w najnowšim posudku aktualneho rizika piše.
Wuspěšna inscenacija
Krótkopowěsće (18.11.16)
Wutworja muzejowu załožbu
Žitawa. Zelena swěca za „Muzejowu załožbu klóšter franciskanow w Žitawje.“ Měšćanska rada je wyšeho měšćanostu społnomócniła, přihotować wutworjenje muzejoweje załožby. Tole zdźěli rěčnik města. Partnerka města budźe tamniša ewangelsko-lutherska wosada. Załožba ma zakład być k zachowanju klóšterskeho objekta franciskanow z 13. lětstotka.
Orchester nominowany
Lipsk. Lipšćanski Sukelniski orchester je za mjezynarodne hudźbne myto ICMA 2017 nominowany. Nastork je produckija DVD z Beethovenowej 9. sinfoniju, kotruž je orchester z čestnym dirigentom Herbertom Blomstedtom nahrawał. ICMA je jeničke mjezynarodne myto za klasiske CDje a DVDje. Spožča je 1. apryla we wobłuku koncerta w Lipsku.
Nowe dorěčenje
Krótkopowěsće (17.11.16)
Dalšej padaj ptačeje gripy
Borna. W Sakskej stej dalšej padaj ptačeje gripy wobkrućenej. W mortwymaj kačkomaj, kotrejž běchu minjenu njedźelupři jězoru njedaloko Lipska našli, su strašny wirus H5N8 zwěsćili, zdźěli Lipšćanski krajnoradny zarjad. Minjeny tydźeń běchu wirus pola mortweje kački při samsnym jězoru namakali. Po wšej Sakskej dyrbi pjerizna w kurjencach wostać.
„Freitalska skupina“ w srjedźišću
Drježdźany. Prawniski wuběrk Sakskeho krajneho sejma je so dźensa na wurjadnym posedźenju z móžnymi kontaktami sakskeho wustawoškita z prawicarskoradikalnej „Freitalskej skupinu“ zaběrał. Na njezjawnym posedźenju prašachu so zastupnikow nutřkowneho a justicneho ministerstwa. Lěwica bě sej tele wurjadne posedźenje žadała.
Ivana Trump wulkopósłanča?
Krótkopowěsće (15.11.16)
Pjerizna ma w chlěwach wostać
Drježdźany. Po najnowšim padźe ptačeje gripy w Sakskej dyrbi pjerizna nětko po wšěm zwjazkowym kraju w kurjencach a chlěwach wostać. Tole ministerstwo za socialne a škit přetrjebarjow wčera wječor wukaza. Tak chcedźa tomu zadźěwać, zo so strašny wirus H5N8 mjez pjeriznu dale rozpřestrje.
Hłowna dróha zawrjena
Pančicy-Kukow. Znajmjeńša hač do kónca tydźenja wostanje hłowna dróha z Budyšina přez Pančicy-Kukow na směr Kamjenc zawrjena. Přičina je, zo wutwarjeja tam hižo dlěši čas kolesowarsku šćežku hač ke klóšterskej muri, zo su zajězd do Lipja wo tójšto powjetšili a zo přińdźe nětko na dróhu nowa woršta bitumena. Po zdźělenju zamołwitych je wobjězd na taflach derje wupisany.
Z jastwa tuńšo telefonować
Krótkopowěsće (14.11.16)
Hłowna zhromadźizna w Kulowje
Kulow. Čłonojo Spěchowanskeho kruha za serbsku ludowu kulturu su so minjenu sobotu na swojej lětušej hłownej zhromadźiznje w Kulowje schadźowali a sej zawod Krabatowy mlokowy swět w Koćinje wobhladali. Ke klětušim předewzaćam słušeja znowa Serbske jutrowne wiki, kotrež chcedźa 2017 11. a 12. měrca 26. raz w Budyšinje přewjesć.
Zastrow při wólbach zwrěšćił
Drježdźany. Holger Zastrow, předsyda sakskeje FDP, je na wólbnej konferency strony za wólby zwjazkoweho sejma 2017 zwrěšćił. 47lětny předewzaćel při wothłosowanju wo direktnym kandidaće za Drježdźanski wólbny wokrjes 160 swojemu kontrahentej Christophej Blödnerej (34) podleža. Blödner dósta 20 hłosow, Zastrow jenož 19. Wón je wot lěta 1999 krajny předsyda sakskeje FDP.
Wjace mlokowych tankownjow
Krótkopowěsće (11.11.16)
Škitne naprawy za pjeriznu?
Drježdźany. Po někotrych padach ptačeje gripy we wjacorych zwjazkowych krajach pruwuja tež w Sakskej škitne naprawy za domjacu pjeriznu, na přikład zakaz pastwu wužiwać. Dotal pak w swobodnym staće hišće žadyn pad tuteje mrětwy nimaja, zdźěli strowotniske ministerstwo. Najebać to su wšitke žiwidła kontrolowace a weterinarne zarjady wo „aktualnych rizikach“ informowane.
Pruwuja wosuški
Drježdźany. Hodowny wosušk lěta 2016 je tuchwilu w pruwowanskej fazy. Dźensa su fachowcy w nadawku škitneho zwjazka „Drježdźanski wosušk“ z kwalitnym pruwowanjom sławneho pječwa pokročowali. Pěšcy móža jim w Drježdźanskej galeriji při Starych wikach přihladować. Cyłkownje 150 wosuškow pjekarjow z Drježdźan a wokoliny tam pruwuja.
Zběrki na dobro zbrašenych
Krótkopowěsće (10.11.16)
Sylny sněh w Pólskej
Waršawa. Po sylnym sněhowanju minjenu nóc je na wuchodźe Pólskeje zastaranje z milinu z městnami přetorhnjene. Dźensa rano bě we wojewódstwje Podlaskie něhdźe 8 000 domjacnosćow bjez miliny, kaž zamołwići zdźělichu. Milinowody běchu so mokreho sněha dla torhnyli. Po informacijach wjedrarjow nańdźe so hač do 15 centimetrow sněha.
Češa ponowja syriske pomniki
Praha/Damaskus. Čěscy fachowcy chcedźa Syriskej pomhać, přez wójnu wobškodźene historiske pomniki zaso ponowić. Po informacijach direktora Praskeho Narodneho muzeja Michala Lukeša je čěska strona Syričanam wotpowědne srědki a pomoc poskićiła. Někotre předmjety chcedźa w specialnych dźěłarnjach w Čěskej republice ponowić.
Kóždy dźesaty předołženy
Krótkopowěsće (09.11.16)
Čestnu Lubinu spožčili
Choćebuz. Na wčerawšim swjatočnym wotewrjenju 26. Choćebuskeho filmoweho festiwala w tamnišim statnym dźiwadle su jednaćelku filmoweho spěchowanja Medienboard Berlin-Brandenburg Kirsten Niehus z čestnej Lubinu wuznamjenili, a to za jeje zasłužby wo wuwiće srjedźo- a wuchodoeuropskeho filma. Niehus je štwórta lawreatka tohole myta.
Gauck pogrom wopominał
Choćebuz. Zwjazkowy prezident Joachim Gauck je dźensa w Choćebuzu wopory nacistiskeho pogroma wopominał. Zhromadnje z braniborskim ministerskim prezidentom Dietmarom Woidku (SPD) wón při wopomnišću na městnje zničeneje synagogi wěnc połoži. 9. nowembra 1938 běchu nacionalsocialisća po wšej Němskej židowske synagogi, wobchody a bydlenja nadběhowali.
Němska wosada w čěskej stolicy
