Krótkopowěsće (22.07.16)
Nuzowe zastaranje wobćežne
Frankfurt n. W. Nuzowa medicina podłu němsko-pólskeje mjezy ma njedostatki. Puće do přichodneje chorownje su častodosć předołhe, rjekny direktor Frankfurtskeho klinikuma Thomas Funk. Za krótši puć do chorownje na tamnym boku rěki pak pobrachuje kooperaciske zrěčenje. Němsko-pólske dojednanje je na kóždy pad trěbne, Funk potwjerdźi.
Rekordne žně hromaka
Podstupim. Telko hromaka kaž hišće ženje su lětsa w Braniborskej nažnjeli. Ratarjo nakałachu cyłkownje 19 600 tonow tuteje zeleniny. To je 27,8 procentow wjace hač loni, zdźěla tamniši statistiski zarjad. Mnóstwo je zdobom rekord. Poprawom běchu plahowarjam skerje snadne žně wěšćili. Hromak plahowali su lětsa na 3 400 hektarach.
Kitesurfing dowoleny
Hamor. Kitesurfowarjo smědźa přichodnje tež Bjerwałdski jězor wužiwać. Sakska krajna direkcija je wodosportej na wotmjezowanym arealu přizwoliła, kaž dźensa rěkaše. Gmejna Hamor ma do toho wěstotne naprawy přewjesć a čaru markěrować. Kitesurfing je sport, při kotrymž mały parašut surfowarja po wodźe ćehnje.
Krótkopowěsće (21.07.16)
Vattenfall dale z minusom
Stockholm. Šwedski energijowy koncern Vattenfall je w 2. kwartalu lěta straty třoch miliardow eurow nadźěłał. Tež wobrot je dale woteběrał, kaž šef koncerna Magnus Hall dźensa ze Stockholma zdźěli. „Hospodarske połoženje wostanje niskich płaćinow miliny dla dale jara wobćežne“, wón rjekny. Hall chcył łužisku brunicowu wotnožku ručež móžno čěskemu koncernej EPH předać.
Spěchowanske srědki přepodała
Běła Woda. Sakska ministerka za socialne a škit přetrjebarjow Barbara Klepsch (CDU) je dźensa Běłowodźanskej wokrjesnej chorowni přizwolenje spěchowanskch srědkow nimale 1,5 milionow eurow za ponowjenje tamnišeje intensiwneje stacije přepodała. Twarske a techniske njedostatki wobstejaceje stacije maja so wotstronić.
Z truskalcami spokojom
Drježdźany. Sakscy ratarjo móža lětsa na dobre žně truskalcow zhladować. „Smy spokojom z kwalitu a mnóstwom“, měni předsyda krajneho ratarskeho zwjazka Sakski sad Gerd Kalbitz. Zliwki njejsu truskalcam tyli, přiwšěm bilanca spokojo. Kalbitz liči za Saksku z wunoškom něhdźe 3 000 tonow.
Krótkopowěsće (20.07.16)
Wo imersiji so wobhonił
Pančicy-Kukow. Na swojim wčerawšim wopyće w klóštrje Marijinej hwězdźe zetka so šef sakskeje statneje kenclije dr. Fritz Jaeckel (CDU) z Janom Bartom. Jaeckel wobhoni so wo nazhonjenjach a wuspěchach dwurěčneho kubłanja po koncepće imersije, kiž bě Jan Bart před lětami na wusahowace wašnje nastorčił a kotryž dźensa wuspěšnje nałožuja.
Žane dowolowe lěty
Moskwa. Najwjetša lětanska towaršnosć Ruskeje Aeroflot je předań lisćikow za lěty do Istanbula a Antalyje přetorhnyła. Ruski lětanski zarjad bě to wukazał, dokelž ma połoženje w Turkowskej po wojerskim puču za njewěste. Lěty wottam do Ruskeje su porno tomu hišće móžne. Minjeny kónc tydźenja bě so 2 000 ruskich dowolnikow z Turkowskeje wróćiło.
Do jastwa na čas žiwjenja
Krótkopowěsće (19.07.16)
Biografija Brězana jako e-book
Budyšin. K 100. posmjertnym narodninam Jurja Brězana bě Ludowe nakładnistwo Domowina prěnju wobšěrnu biografiju wo jeho žiwjenju a tworjenju pod hesłom „Jurij Brězan – Leben und Werk“ wudało. Kniha prof. dr. Dietricha Šołty předleži mjeztym tež jako e-book. Skazać móža sej jón zajimcy we wotpowědnych internetnych wobchodach.
Čěska literatura ćežišćo
Lipsk/Praha. Awtorojo a nakładnistwa z Čěskeje maja na Lipšćanskich knižnych wikach 2019 w srjedźišću stać. Na to staj so čěski minister za kulturu Daniel Herman a direktor Lipšćanskich wikow Oliver Zille wčera w Praze dojednałoj. Wo detailach chcedźa hišće jednać, zrěčenje ma so klětu podpisać. Klětu budźe Litawska, lěto pozdźišo Rumunska ćežišćo Lipšćanskich knižnych wikow.
Zakoń tyje zahrodkarjam
Krótkopowěsće (18.07.16)
Teslu do Kamjenca wabić
Palo Alto/Kamjenc. Sakska chce Teslu wabić, w Kamjencu zawod baterijowych bańkow twarić. Dokelž chce ameriski twarc elektroawtow w Europje inwestować, bě jemu sakski statny sekretar Hartmut Mangold při rozmołwach w Kaliforniskej Kamjenc namjetował, rozprawja MDR. Zasydlenje móhła Sakska z hač do 15 procentami spěchować. Tesla zhotowja jako jenički zawod e-awta z dosahom (Reichweite) wjac hač 400 kilometrow.
Literarne myto Drježdźanjance
Drježdźany. Sakske literarne myto 2016 dóstanje Drježdźanska spisowaćelka Franziska Gerstenberg. 5 500 eurow hódne myto spožča 37lětnej za socialnokritisku twórbu „Tak dołho po tym – dawno hižo njewěrne“. To zdźěla ministerstwo za wuměłstwo w Drježdźanach. Gerstenberg běchu hižo wospjet wuznamjenili, mjez druhim lěta 2013 ze Lessingowym spěchowanskim mytom.
18 awtow wobškodźenych
Krótkopowěsće (15.07.16)
Nowa serbska proza němsce
Drježdźany. Lětnje wudaće němskeho literarneho časopisa Signum wěnuje so druhi raz po lěće 2006 nowej serbskej literaturje. Dorothea Šołćina, Ingrid Hustetowa, Měrana Cušcyna, Hańža Wjeselic a Marion Kwicojc předstajeja swoje teksty. Benedikt Dyrlich, kiž bě wudawaćela Norberta Weissa podpěrował, je z basnju zastupjeny.
Bjez delanskeje gmejny
Ralbicy. Kaž běchu so čłonojo gmejnskeje rady Ralbicy-Róžant hižo na swojim zašłym posedźenju wuprajili, woni wčera w Ralbicach oficialnje wobzamknychu, so na zhromadnej přemysłowej přestrjeni zarjadniskeho zwjazka Při Klóšterskej wodźe njewobdźělić. Dokelž njeje znate, kotre wudawki gmejnje z toho nastanu, je radźićelam riziko přewulke so za přestrjeń pola Miłoćic angažować.
Nowe dźěłowe městna
Krótkopowěsće (14.07.16)
Žane zapławjenja njebyli
Budyšin. Za dźensa připowědźene móžne zapławjenja sylneho dešća dla su w Hornjej Łužicy wuwostali. Byrnjež so cyły dźeń dešćowało, rěki mnóstwa wody přiwzachu a njejsu přeběželi. Pegele, mjez druhim Klóšterskeje wody a Čornicy, drje postupichu hač do popołdnja wo něhdźe 30 centimetrow a dalše zdźěla wjace, wostachu pak pod alarmowym schodźenkom.
WWF přilubja myto
Berlin. Po najnowšim morjenju wjelka w Sakskej přilubja wobswětoškitna organizacija WWF 25 000 eurow za rozsudny pokiw na skućićela. Nimo toho žada sej WWF intensiwniše přesćěhanje skućićelow. Minjene tři lěta su w Němskej 18 wjelkow ilegalnje morili. Pola Biehaina w Zhorjelskim wokrjesu nańdźechu minjenu sobotu zatřělenu wjelčicu.
Kritizuja nowy zakoń
Krótkopowěsće (13.07.16)
Akcije přećiwo internetnej hidźe
Lipsk. We wobłuku wšoněmskeje akcije přećiwo hidypołnym komentaram w interneće je policija dźensa w Sakskej wjacore bydlenja přepytała. Kaž rěčnica operatiwneho wotwobaranskeho centruma w Lipsku zdźěli, běchu tež bydlenja we wuchodnej Sakskej potrjechene. Slědźenja měrja so přećiwo 60 podhladnym w 14 zwjazkowych krajach.
Dalše sylne njewjedra
Waršawa. Wulke zliwki su minjenu nóc we Waršawje dwě staciji metro zapławili. Po nachwilnym zawrjenju móžachu jej zaso wotewrěć, rozprawja sćelak TVN24. Dwaj dnjej trajace njewjedra su pólsku stolicu dotal wosebje trjechili. Dróhi a pincy stejachu pod wodu. W měsće wudyri wobchadny chaos. Wichor je třěchi 170 domskich wobškodźił.
T-shirt škita žiwjenje
Krótkopowěsće (12.07.16)
Lětnja šula njebudźe
Lipsk. Lětuša Serbska lětnja šula Lipšćanskeje uniwersity so njepřewjedźe, dokelž njebě dosć přizjewjenjow. To zdźěli dr. Christine Nieke z wotrjada za wědomostne dalekubłanje a dalokostudij na naprašowanje SN. Dwutydźenski kurs hornjoserbšćiny na wšelkich wukonowych schodźenkach měješe so wot 24. julija do 5. awgusta wotměć.
Njewjedra zachadźeli
Waršawa. Po nócnych njewjedrach ze zliwkami a krupami bě dźensa rano w Pólskej něhdźe 30 000 domjacnosćow bjez miliny, dokelž bě wichor milinowody roztorhał. W srjedźnej Pólskej wołachu wohnjowu woboru wjace hač 1 100 króć, zdźěla sćelak TVN24. Třo wobornicy so zranichu. Přichodne dny wočakuja dalše strašne njewjedra.
Datajowy supercenter
Praha. W gmejnje Zeleneč na wuchodźe Prahi nastawa nowy databazowy center, wopřijacy škitane statne daty nastupajo staćanow, dawki a dalše čućiwe zapiski. Nimo financneho ministerstwa měli nowe internetne składźišćo tež dalše statne organy wužiwać. Twar w hódnoće wjace hač dźesać milionow eurow chcedźa w januaru 2019 přepodać.
Krótkopowěsće (11.07.16)
Bamž změje noweho rěčnika
Rom. Bamž Franciskus dóstanje noweho medijoweho rěčnika. Wjelelětny nawoda nowinarskeho běrowa Federico Lombardi přewostaji zastojnstwo ameriskemu žurnalistej Gregej Burkej, kaž Vatikan dźensa zdźěli. 56lětny Burke ma spočatk awgusta dźěłać započeć. 73lětny Lombardi bě so za čas bamža Benedikta XVI. z nowinskim šefom stał.
Gorbačow kritizuje wjeršk NATO
Moskwa. Wojerske naprawy, wobzamknjene zašły pjatk wot Waršawskeho wjerška NATO, je něhdyši prezident Sowjetskeho zwjazka Michail Gorbačow mjenował přihot na přechod ze zymneje na horcu wójnu. Wón kritizowaše sewjeroatlantiski zwjazk za to, zo nosy do poćahow z Ruskej spochi wjetšu napjatosć. „NATO drje rěči wo zakitowanju, we woprawdźitosći pak přihotuje so na nadpadowe operacije“ (hlej 2. stronu).
Kniha Nowaka nětko digitalnje
