Krótkopowěsće (24.07.19)

Mittwoch, 24. Juli 2019 geschrieben von:

Twarske dźěła so dlija

Pančicy-Kukow. Hinak hač spočatnje planowane njebudźe pjekarnja w klóštrje Marijinej hwězdźe w Pančicach-Kukowje hač do kónca awgusta hotowa. Kaž zdźěli dźěłarnja za zbrašenych, ke kotrejž pjekarnja słuša, so twarske dźěła dlija. Tuchwilu njemóža hišće rjec, kak dołho dźěła w pjekarni hišće traja. To samsne přitrjechi za kofejownju a přechod do klóšterskeje zahrody.

We warjenskej bitwje

Mainz. We warjenskej show ZDF „Die Küchenschlacht“ je tón tydźeń Lubina Ješkec mjez mjezy-finalistami. Póndźelu přeswědči wona ze serbskej kwasnej poliwku a twarohowymi kulkami, wčera z apri­kozowym tykancom a waflu. Najpozdźišo pjatk budźe jasne, hač zaćehnje z Chelna pochadźaca Serbowka a w Mnichowje skutkowaca kosmetikarka do finala najlěpšich šěsć hobbyjowych kucharjow.

Skóržba wotpokazana

Krótkopowěsće (23.07.19)

Dienstag, 23. Juli 2019 geschrieben von:

Łužiska alianca skorži

Wětošow. Přećiwo rozsudej nawody braniborskeje krajneje wólbneje komisije, zo njesmě Łužiska alianca (ŁA) k wólbam braniborskeho krajneho sejma nastupić, je serbska strona Krajnemu wustawowemu sudnistwu skóržbu zapodała. Nimo krajneje lisćiny su tež wšitkich šěsć direktnych kandidatow aliancy za tři wólbne wokrjesy wotpokazali. ŁA njebě pozdatnje trěbnu ličbu podpěrowanskich podpismow docpěła.

Hry lěta wozjewjene

Konstanz. Towarstwo Hra lěta je lětušich dobyćerjow po nim pomjenowaneho wuznamjenjenja wozjewiło. Titul „Hra lěta“ přiznachu hódanskej hrě „Just One“, kotraž je „genialnje jednore zabłysknjenje dycha a garant komunikatiwneho wjesela“, kaž we wobkrućenju rěka. „Hra lěta za znawcow“ je deskowa hra „Machot křidłow“, najkmańša za dźěći rěka „Doł Wikingow“.

Křižowy puć na nowe wašnje

Krótkopowěsće (22.07.19)

Montag, 22. Juli 2019 geschrieben von:

Kóń we wohenju zahinył

Kamjenc. Woheń w Brunjowskim konjencu je škodu něhdźe 200 000 eurow wuskutkował. Wohnjowa wobora zamó jón drje zhašeć a pjeć konjow wuchować, jedne zwěrjo pak w płomjenjach zahiny. Přičina wčera wječor wudyrjeneho wohenja dotal jasna njeje. Policija pad přepytuje, powěsćernja dpa zdźěla.

Indiska měri so na měsačk

Bangalore. Indiski zarjad za wuslědźenje swětnišća ISRO je dźensa sondu Chandrayaan-2 startował. Wona ma spočatk septembra měsačk docpěć a blisko južneho čopa zemskeho trabanta Rover mjenowane jězdźidło wusadźić. Mjez druhim su geologiske eksperimenty planowane. Šlachći-li so předewzaće, by so Indiska po Sowjetskim Zwjazku, USA a Chinje ze štwórtym krajom stała, kotremuž so tajka misija poradźi.

Hladanje po nowym modelu

Krótkopowěsće (19.07.19)

Freitag, 19. Juli 2019 geschrieben von:

Serbski přinošk w Pólskej

Wolimierz. Duwo Hara Crash zakónči jutře z wustupom na festiwalu Anarcho Folk Fest mału turneju po Pólskej. Předstaja tam swoju EP „Halfway Reveries“, kotraž nazymu tež jako winylowa tačel wuńdźe. Hudźbnikaj cyłka, kotryž hodźi so žanrej indietronica přirjadować, staj dotal mjez druhim w skupinomaj stoned hajtzer a Berlinska Dróha skutkowałoj.

Přećiwo hidźe w syći

Berlin. Składnostnje mjezynarodneho akciskeho dnja za potrjechenych kriminality z hidy póndźelu namołwitej narodny komitej hibanja No Hate Speech a Zwjazk žurnalistow Němskeje (DJV), w interneće „digitalnu ciwilnu kuražu“ pokazać a „preč njehladać, ale aktiwni a solidarni być. Mjeztym so tak hani, rani a hrozy, zo wěcowna diskusija často wjace móžna njeje“, w zdźělence DJV rěka.

Próstwy wo spěchowanje stajić

Krótkopowěsće (18.07.19)

Donnerstag, 18. Juli 2019 geschrieben von:

Přehladka wo mjeńšinach

Drježdźany. Pućowanska wustajeńca „Narod a mjeńšina w Europje“ je wot­nětka w Sakskim statnym ministerstwje za nutřkowne přistupna. Wona wobswětluje wuznam awtochtonych ludow w dobje historiskeho nacionalizma a z tuteje nastatych narodnych krajow. Wuhotowarka přehladki je towarstwo „Spominanje a zetkanje“, zastupowace zajimy něhdy wuhnatych Němcow.

Žane chłostanki w Sakskej

Drježdźany. Wobdźělenja na demonstracijach Fridays for Future dla njeje hižo žana swójba w Sakskej dźělenku wo pokutnych pjenjezach dóstała. W Mannheimje (Badensko-Württembergska) su štyri swójby dźělenku wo pokutnych pjenjezach we wysokosći 88,50 eurow dóstali.

Potomnikow wotkryli

Krótkopowěsće (17.07.19)

Mittwoch, 17. Juli 2019 geschrieben von:

Łužiske jězory nimale połne

Rań. Wjetšina bywšich brunicowych ja­mow­ we Łužicy je k 88 procentam z wodu pjelnjena. To rjekny jednaćel Łuži­ske­je a srjedźoněmskeje towaršnosće hór­­nistwoweho zarjadnistwa Klaus Zschied­rich na kromje wopyta wobswětoweje ministerki Svenje Schulze (SPD) minjeny tydźeń w Ranju (Großräschen). Pławjenje chcedźa za tři lěta wotzamknjene měć. Zahajili běchu je před 23 lětami.

Městnje wupisanej

Zły Komorow/Lubin. Wokrjesaj Hornje Błóta-Łužica a Dubje-Błóta stej městnje zamołwiteju za serbske naležnosće na swojich internetnych stronach wupisałoj. Nadawk zamołwiteho je we wšěch naležnosćach komuny zajimy Serbow zastupować. Požadać móža so zajimcy w Złym Komorowje (Senftenberg) hač do 8. awgusta, w Lubinje (Lübben) hač do 10. awgusta.

Sydlišćo na jězorje dźesać lět

Krótkopowěsće (16.07.19)

Dienstag, 16. Juli 2019 geschrieben von:

Wolóženja ratarjam

Drježdźany. Sakscy ratarjo smědźa tež lětsa puste a njewobdźěłane płoniny za dźěłanje picy a jako pastwu wužiwać. To zdźěli wčera Sakske ratarske ministerstwo. Přičina je trajaca suchota. Rjadowanje, z kotrymž chce swobodny stat ratarjam aktualne połoženje trochu wolóžić je wot dźensnišeho po cyłej Sakskej płaćiwe.

Wólbne haćenje

Huštań. Łužiska alianca (ŁA) njeliči do na­zymy z jednanjom skóržby haćenja komunalnych wólbow w Kamjencu dla. Strona bě ju njedawno Drježdźanskemu zarjadniskemu sudnistwu zapodała. Předsyda ŁA Hanzo Wylem-Kell měni, zo bu strona při zběranju podpěraćelskich podpismow w Kamjencu masiwnje haćena. Tam chcyše mj. dr. za měšćansku radu kandidować. Pobrachowało je k wobdźělenju skónčnje jeničke podpismo.

Dalekubłanja trěbne

Krótkopowěsće (15.07.19)

Montag, 15. Juli 2019 geschrieben von:

Předmjena nětko online

Budyšin. Na internetnej stronje soblex.de­ su nětko předmjena z knižki Tima­ Meškanka „Serbske předmjena“ zapři­jate. Kaž zdźěli Serbski institut, su jeho­ sobudźěłaćerjo wjac hač 1 200 předmjenow do internetoweho słownika za­dźě­łali. Za kóžde pokazaja tam tež ta­bulku ze wšěmi gramatiskimi formami. Podate su tež pokiwy k dźělenju. Podpěrał je naprawu Rěčny centrum WITAJ.

Nowa taflička na A 4

Budyšin. Na Silbermannowe pišćele w Chróstawje ma přichodnje tafla na awtodróze A 4 skedźbnjeć. Nimo přiražki wuchodoněmskeho zwjazka lutowarnjow su předewšěm priwatnicy přede­wzaće spěchowali. Gottfried Silbermann bě najwuznamniši twarc pišćelow baroka. W Sakskej je hišće 30 pišćelow wot njeho. Přichodny tydźeń tafličku na A 4 do směra na Zhorjelc připrawja.

Začinja „Łužisku chorownju“?

Krótkopowěsće (12.07.19)

Freitag, 12. Juli 2019 geschrieben von:

Slědy wjedu do bronzoweje doby

Choćebuz/Slepo. Při přepytowanju zasy­dlenskeho areala za Nowy Miłoraz w Slepom su archeologojo nimo popjelnicoweho rowa z bronzoweje doby na dźělnej přestrjeni blisko po­hrjebnišća sydlen­ske městno wotkryli, kaž přede­wzaće LEAG informuje. Rěč je dale wo wjace hač 400 jednotliwych nama­kan­kach z rozdźělnych dobow. Kedźby­hódne su powostanki nimale sto wuškrěwanskich pjecow za dobywanje železa.

Dešno złotu medalju dóstało

Berlin/Dešno. Dešno pola Choćebuza je jedna z wosom wsow, kotrež su juro­rojo wubědźowanja zwjazkoweho ministerstwa za zežiwjenje a ratarstwo „Naša wjes ma přichod“ ze złotej medalju počesćili. Z njej zwjazany je mytowanski pjenjez 15 000 eurow. Z něhdźe 1 900 wobdźělenych wsow bě so 30 do finala dóstało. 15 wsow mytowachu ze slěbrom.

Wodźenja tež za slepych

Krótkopowěsće (11.07.19)

Donnerstag, 11. Juli 2019 geschrieben von:

Wo šansy strukturneje změny šło

Wochozy. Strukturna změna tworješe žro wčerawšeho wopyta zamołwiteho Zwjazka za turizm Thomasa Bareißa we Wo­chožanskim parku błudźenkow. Wo­na měła so direktnje na dobro woby­dlerjow wuskutkować, sej Bareiß žadaše. Wčera we Wochozach je wón tež ze zastupnikami sakskeje statneje kenclije a hospodarskeho ministerstwa šansy a ćeže strukturneje změny rozjimał.

Wjeršk nabožnych dnjow dožiwili

Róžant. Z putnikowanjom do Róžanta dožiwi lětuši nabožny tydźeń serbskich wosadow wčera swój wjeršk. Dopołdnišim kemšam přizamkny so zhromadny wobjed, a putnicy mějachu na łuce za Božim domom wšelaku zaběru. Z nyšporom so dźěćace putnikowanje zakónči. Lětsa je telko dźěći na nabožnych dnjach wobdźělenych kaž hišće ženje. Jeničce w Chrósćicach je jich 170.

Za mišterstwa kwalifikowanej

Anzeige