Krótkopowěsće (18.05.16)

Mittwoch, 18. Mai 2016 geschrieben von:

Protestny camp rozpušćeny

Miłoraz. Policija je dźensa rano protestne lěhwo we Łužicy wobstupiła a camp LAUtonomia rozpušćiła. Demonstrantam, kotřiž su wot spočatka měrca na štomach w bjezposrědnim susod­stwje Wochožanskeje wuhloweje jamy žiworili, wumjetuja ranjenje domjaceho měra, kaž medije rozprawjeja. Dźensa bě w lěhwje něhdźe 20 ludźi, kotrychž policija wšitkich sobu wza.

Skóržby přećiwo VW zapodali

Braunschweig. W zwisku ze skandalom manipulowaneho wotpłuna dla je na Braunschweigskim krajnym sudni­stwje dotal 46 skóržbow wobsedźerjow awta VW dóšło. Dźěl ludźi sej žada, zo směli swoje manipulowane wozy awtotwarcej wróćić. Tamni žadaja sej wot Volkswagena wotškódnjenje, sudnistwo zdźěli.

Nanowski dowol schwaleny

Praha. Čěske knježerstwo je naćisk zakonja schwaliło, po kotrymž móhli po narodźe dźěsća tež nanojo tydźeń doma wostać. W tym času změja woni prawo na 70 procentow mzdy. Čěska chce so tak do 23 z cyłkownje 28 krajow EU zarjadować, kotrež formu płaćeneho „nanowskeho dowola“ praktikuja. Nowelu dyrbi hišće parlament schwalić.

Krótkopowěsće (17.05.16)

Dienstag, 17. Mai 2016 geschrieben von:

Walentin Bjedrich slěbro dobył

Kassel. Wěteńčan Walentin Bjedrich, je na zwjazkowym wubědźowanju „Młodźina hudźi“ na klawěrje zhromadnje z partnerom Leopoldom Ruckerom na kontrabasu 2. městno wobsadźił. Tež Celine Seifertec z Wjelećina z popowym spěwom a Lukas Hartmann z Budyšina na akordeonje docpěštaj 2. městno. Hač do srjedy so w Kasselu 2 400 młodych hudźbnikow wubědźuje.

Kardinal Lehmann na wuměnk

Mainz. Sobu najwoblubowanišeho němskeho biskopa, kardinala Karla Lehmanna, su na jeho wčerawšich 80. narodninach na wuměnk rozžohnowali. Japoštołski nuncius w Němskej, arcybiskop Nikola Eterović, na Božej mši w Mainzu zwurazni, zo je bamž Franciskus wotpowědnej próstwje Lehmanna přizwolił. Lehmann bě 21 lět předsyda biskopskeje konferency.

Wo Čěskej w chinšćinje

Krótkopowěsće (13.05.16)

Freitag, 13. Mai 2016 geschrieben von:

Ostrale nětko w Pólskej

Wrócław. Drježdźanska wustajeńca Ostrale wuhotuje wot dźensnišeho hač do 31. julija w europskej kulturnej stolicy Wrócławju přehladku z twórbami 64 wuměłcow, mjez nimi Maje Nageloweje. We wobłuku wuměny mjez partnerskimaj městomaj chcedźa so Wrócławscy wuměłcy na Drježdźanskej Ostrali wot 1. julija do 25. septembra předstajić.

Jědźne karty tež čěsce

Liberec/Žitawa. Naměstnik Liberecskeho měšćanosty Jan Korytář je minjenej tydźenjej w Žitawskej radnicy přebywał. Wón a wyši měšćanosta Thomas Zenker staj wo tym rozmyslowałoj, kak móhłoj jeju měsće wušo hromadźe dźěłać. Po jednym z namjetow móhli jědźne karty w Žitawskich hosćencach tež w čěšćinje poskićeć. Čěscy turisća bychu tak rěčnu barjeru lěpje přewinyli.

Hospodarstwo dale rosće

Krótkopowěsće (12.05.16)

Donnerstag, 12. Mai 2016 geschrieben von:

Jendźelske myto Serbowce

London. Serbsku dirigentku Judit Kubicec su wčera w Londonje z čestnym mytom Kralowskeje hudźbneje akademije wuznamjenili. Tele myto spožča institucija něhdyšim studentam, kotřiž žněja na swojim polu mjezynarodne připóznaće. K dotal počesćenym absolwentam słušataj tež swětosławnaj hudźbnikaj Sir Simon Rattle a Sir Elton John.

Fabjan Hafner zemrěł

Celovec/Klagenfurt. Korutanski Słowjenc Fabjan Hafner je wutoru cyle njenadźicy w Celovecu zemrěł. Spisowaćel, lyrikar, literarny wědomostnik a přełožowar bě před lětomaj we wobłuku prěnich Serbskich dnjow w Korutanskej wjacore zarjadowanja wuhotował. Wón zajimowaše so za našu literaturu a měješe dobre styki k serbskim spisowaćelam.

Wuswojenje metro dla

Praha. W zwisku z planowanym twarom štwórteje čary metro na juhowuchodźe Prahi w lěće 2018 bědźa so zamołwići z wobsydstwowymi problemami: Z cyłkownje 800 trěbnych ležownosćow je město dotal hakle 15 kupić móhło. W radnicy tuž wo tym rozmysluja wobsedźerjow wuswojić, štož by najmasiwniše wuswojenje minjenych lět było.

Krótkopowěsće (11.05.16)

Mittwoch, 11. Mai 2016 geschrieben von:

Pola statneho sekretara byli

Drježdźany. Zastupjerjo Foruma wobydlerjow Hornjeje Łužicy zetkachu so wčera w sakskim hospodarskim ministerstwje ze statnym sekretarom Stefanom Brangsom (SPD). Přitomnaj běštaj tež zastupjerjej Zwjazka serbskich wuměłcow Janka Rögnerowa a Měto Benada. Mjez druhim rěčachu wo 3. hornjołužiskim dnju 21. awgusta, kotryž Zwjazk serbskich wuměłcow sobu wuhotuje.

Fleksibelnišo do renty

Berlin. Dźěławi w Němskej móža wot klětušeho fleksibelnišo do renty hić. Wotpowědne plany koalicije chcedźa nětko do zakonskeje formy přinjesć, zastupnicy CDU a CSU dźensa w Berlinje připowědźichu. Štóž so přichodnje hižo z 63 lětami na wuměnk poda, smě sej wjace hač do 450 eurow přizasłužić, bjez toho zo jemu rentu drastisce skrótša.

Jězdźa zaso k Baltiskemu morju

Krótkopowěsće (10.05.16)

Dienstag, 10. Mai 2016 geschrieben von:

Muž z nožom morjeny

Grafing. Při nadpadźe z nožom je dźensa rano na dwórnišću w hornjobayerskim Grafingu muž žiwjenje přisadźił. 50lětny bu tak ćežko zranjeny, zo w chorowni wudycha. 27lětny skućićel němskeho sta­ćanstwa je nimo toho třoch dalšich muži zranił. Policija jeho hišće na dwórnišću zaja. Po prěnich dopóznaćach měješe wón psychiske a drogowe problemy.

Trezor z nadawkami pokradnyli

Drježdźany. Njeznaći su so do jedneje Drježdźanskeje wyšeje šule zadobyli a trezor pokradnyli. W nim běchu nadawki za kónčne pruwowanja składowane. Njehodźi so wuzamknyć, zo su podłožki zjawnje znate. Kultusowe ministerstwo je šuli tuž narunanske nadawki posrědkowało. Pruwowanja njejsu wohrožene. Za šulerjow poběži wšitko po planje. Wróćo stajeny nichtó njebudźe.

Zapalerjej zasudźenaj

Krótkopowěsće (09.05.16)

Montag, 09. Mai 2016 geschrieben von:

Syričanka přez pistolu zranjena

Bratislava. Při akciji přećiwo ilegalnje zapućowanym migrantam je słowakska policija Syričanku přez kulku pistole zraniła. Kaž powěsćernja TASR rozprawja, chcychu policisća minjenu nóc južnje Bratislavy štyri z migrantami wobsadźene awta kontrolować. Jedne z nich pak hakle zasta, po tym zo běchu zastojnicy na nje třěleli. 26lětnej Syričance su mjeztym kulku z chribjeta wuoperowali.

Při njezbožu lětadła zemrěł

Teising. Při njezbožu małolětadła w hornjej Bayerskej je 51lětny muž z Budyskeho­ wokrjesa žiwjenje přisadźił. Wón sedźeše wčera popołdnju zhromadnje z 30lětnym w ultralochkim lětadle, jako mašina mjeńšiny po starće njedaloko města Mühldorf na łuku zrazy. Prawdźepodobnje bě motor zaprajił. Fachowcy za lětadłowe njezboža pad pruwuja.

Platini jako šef UEFA wotstupił

Krótkopowěsće (06.05.16)

Freitag, 06. Mai 2016 geschrieben von:

Jasny wotum w interneće

Budyšin. Tři štwórćiny wobdźělnikow na online-naprašowanju Serbskich Nowin z minjeneho pjatka měnja, zo je wot Zhorjelskeho statneho rěčnistwa wozjewjeny kónc jednanja nadpadow na serbskich młodostnych dla dowěru do prawniskeho stata wobškodźił. Wot dźensnišeho čaka pod www.serbske-nowiny.de nowe prašenje na was.

Ratarjo žadaja sej pomoc stata

Paaren/Glien. Braniborscy ratarjo maja embarga přećiwo Ruskej dla dźeń a wjetšu nuzu. „Trjebamy nuznje pjenjezy a podpěru ze stron politiki“, rjekny prezident krajneho zwjazka ratarjow Henrik Wendorff dźensa na zeńdźenju ratarskeho zwjazka w havellandskim Paarenje. Embarga dla su ratarjo po wšej Němskej dotal 800 milionow eurow přisadźili. Čěšćina obligatoriska

Krótkopowěsće (04.05.16)

Mittwoch, 04. Mai 2016 geschrieben von:

Kumštne drogi zakazaja

Berlin. Nowe kumštne drogi, tak mjenowane legal highs, maja so zakazać. Zwjazkowe knježerstwo je dźensa naćisk wotpowědneho zakonja schwaliło. Dotal móžachu zhotowjerjo drogow jednotliwe zakazy wobeńć, nałožujo nowe substancy. Nětko chcedźa cyłe skupiny maćiznow zakazać. Loni bě w Němskej 39 ludźi na tajke chemiske drogi zemrěło.

Přemało priwatnych kwartěrow

Lipsk. Za lětuši 100. zjězd katolikow w Lipsku njejsu organizatorojo, prěni króć w stawiznach zetkanja, hišće dosć priwatnych kwartěrow namakali. Tuchwilu pobrachuje 800 móžnosćow přenocowanja, kaž rěčnik Centralneho komiteja­ katolikow Němskeje Theodor Bolzenius­ dźensa zdźěli. Zjězd katolikow wotměje so wot 25. do 29. meje.

Porta Bohemica škitana

Krótkopowěsće (03.05.16)

Dienstag, 03. Mai 2016 geschrieben von:

Dóstanu halu spěchowanu

Worklecy. Wopismo wo přizwolenju spěchowanskich srědkow za ponowjenje Worklečanskeje sportownje přepoda dźens za tydźeń statny sekretar w sakskim nutřkownym ministerstwje dr. Michael­ Wilhelm wjesnjanosće Francej Bruskej (CDU). Na swjatočnosći w 17 hodź. planowanski běrow předwidźane dźěła rozłoži a časowy wotběh předstaji.

Wuspěšna inscenacija

Budyšin. 706 dźěći z pěstowarnjow a zakładnych šulow Delnjeje Łužicy je sej z lóštom a wjeselom dwurěčnu inscenaciju Němsko-Serbskeho ludoweho dźiwadła „Zgubjone a namakane – Ein Herz und andere Dinge“ wobhladało. Mjez hosćimi běchu tež 404 dźěći w Danskej. NSLDź zliči tuž w tutej hrajnej dobje 1 110 přihladowarjow na 17 předstajenjach.

Šek za šulski twar

Wojerecy. Sakska ministerka za kultus Brunhild Kurth (CDU) je Wojerowske­mu spěchowanskemu centrumej za ćělnje zbrašenych wčera šek w hódnoće 180 000 eurow přepodała. Cyłotne kóšty 450 000 eurow za třěchu Sakska tuž po 40 procentach spěchuje. Ze swojim wopytom chcyše ministerka wosebje dźěło centruma hódnoćić.

Prěnja zjawna hra wubranki

Anzeige