Krótkopowěsće (04.12.15)

Freitag, 04. Dezember 2015 geschrieben von:

W lisće prosy wo pomoc

Pančicy-Kukow. Wosobinski list je wjesnjanosta gmejny Pančicy-Kukow Markus Kreuz (CDU) wčera wšitkim domjacnosćam swojeje komuny připósłał. W nim rozłožuje wón tuchwilnu napjatu situaciju wokoło ćěkancow a skedźbnja na winowatosć komunow, spytać problemy sobu rozrisać. Kreuz wobydlerjow napomina, zo měli gmejnje zdźělić, maja-li móžne swobodne bydlenja a kmane­ płoniny.

Nowe čisło „Naša Domowina“

Budyšin. Nowe čisło informaciskeho łopjena „Naša Domowina“ informuje mjez druhim wo rozsudźe Lubina a Ka­lawy, kotrejž prosytej wo přistup k serbskemu sydlenskemu rumej, a wo wobzamknjenjach zašłeho posedźenja Zwjazkoweho předsydstwa Domowiny. Předstajeni su mjez druhim tež lawreaća lětušeho Myta a Čestneho znamješka Domowiny.

Piwarnja dźěłać započała

Krótkopowěsće (03.12.15)

Donnerstag, 03. Dezember 2015 geschrieben von:

Madźarska skorži přećiwo EU

Budapest. Po Słowakskej chce tež Madźarska přećiwo planowanemu rozrjadowanju ćěkancow po krajach EU z pomocu kwoty skoržić. Wotpowědnu skóržbu chcychu hišće dźensa Europskemu sudnistwu zapodać, rjekny ministerski prezident Viktor Orbán w Budapesće. Słowakska je skóržbu hižo zapodała.

Zwučuja mobilizowanje armeje

Praha. Načolnik generalneho staba čěskeje armeje Josef Bečvář je zdźělił, zo chcedźa mechanizmy mobilizowanja wupruwować. Při tym maja so tež aktiwni rezerwisća do wójska zwołać. Jedna so wo prewentiwnu naprawu jako reakciju na aktualne problemy w zwisku z terorizmom a migraciskej žołmu, kaž čěske medije pisaja.

Myto Wojerowskemu frizerej

Drježdźany. Wojerowski frizerski salon „HaarSchneider“ je dobyćer lětušeho Drježdźanskeho marketingoweho myta. Salon je z poměrnje snadnym budgetom z kedźbyhódnymi akcijemi dobry rozrost docpěł, rěka we wopodstanjenju komisije­. Myto su wčera wječor w Drježdźanach přepodali. Za myto nominowany bě tež zawod za twar pjecow w Budyšinje.

Krótkopowěsće (02.12.15)

Mittwoch, 02. Dezember 2015 geschrieben von:

Přeciwo zasadźenju wójska

Budyšin. W zjawnym lisće předsydźe SPD Sigmarej Gabrielej je so Budyski měšćanski zwjazk strony přećiwo wobdźělenju Zwjazkoweje wobory na wojerskim zasadźenju přećiwo teroristiskej milicy Islamski stat w Syriskej wuprajił. „Na­zhonjenja wuča, zo njehodźi so terorizm z bombami a wójnami wotstronić.“ List podpisał je předsyda Hubertus Schwerk.

Zbrašeni kritizuja knježerstwo

Berlin. Składnostnje jutřišeho Mjezynarodneho dnja zbrašenych je Rada zbrašenych Němskeje zwjazkowe knježerstwo kritizowała. Němska njeje směrnicy UNO k prawam zbrašenych dawno hišće zwoprawdźiła, rada zdźěla. „Zajimy zbrašenych dyrbja so často financnopolitiskim zajimam podrjadować.“ Rada zbrašenych žada sej změnu dotalneho kursa.

Mjetarjo SGB w krajnym finalu

Krótkopowěsće (01.12.15)

Dienstag, 01. Dezember 2015 geschrieben von:

Protestuja w sakskej stolicy

Drježdźany. Sobudźěłaćerjo twarca chipow Globalfoundries chcedźa sobotu w Drježdźanach přećiwo planowanemu wottwarej dźěłowych městnow demonstrować, kaž industrijne dźěłarnistwo za hórnistwo, chemiju a energiju IG BCE zdźěli. Předewzaće bě spočatk oktobra připowědźiło, zo chcyło 800 z cyłkownje 3 700 městnow šmórnyć.

Mjenje bjezdźěłnych w EU

Luxemburg. Bjezdźěłnosć we 18 krajach europasma je so w oktobru na 10,7 procentow znižiła a je tak na najnišim stawje po januaru 2012. We wšěch 28 statach EU bě wona w oktobru z 9,3 procentami tak niska kaž wot septembra 2009 nic. Tole zdźěla statistiski zarjad Eurostat. Najmjenje bjezdźěłnych je w Němskej (4,5 proc.) a Čěskej (4,7), najwjace w Grjekskej (24,4) a Španiskej (21,6).

Wjace pjenjez ratarjam

Frankfurt n. M. Dźěłarnistwo ratarjow IG twar, ratarstwo a wobswět chcyło wyše mzdy za jedyn milion sobudźěłaćerjow němskeho ratarstwa přesadźić. W dźensa zahajenych jednanjach z dźěłodawarjemi žada sej dźěłarnistwo wo 5,9 procentow wyšu mzdu kaž tež lěpše strowotniske zastaranje a zawěsćenje rentow, kaž wone zdźěla.

Krótkopowěsće (30.11.15)

Montag, 30. November 2015 geschrieben von:

Wo wliwje němčiny

Budyšin. Zběrnik „Wliwy němčiny na gramatiske struktury słowjanskich rěčow“ je wušoł. W nim jewja so přinoški 30 rěčespytnikow z Němskeje, Pólskeje, Čěskeje, Šwicarskeje a Słowjenskeje k tutej temje na konferency 2011 w Choćebuzu. Dr. Sonja Wölkowa a dr. Hauke Bartels staj knižku zestajałoj. Němčina je jedna z najwažnišich kontaktnych rěčow za słowjanske ludy.

Nowe pomjenowanje referata

Podstupim. W zwjazkowym ministerstwje za wědomosć, slědźenje a kulturu su mjeno referata 14 na „Naležnosće nabožinskich zhromadźenstwow, Serbow a delnjoněmčiny“ změnili. Wopřijeće Serbja so nětk oficialnje jewi, zdobom­ skedźbnja na tematisce wusko z delnjoserbšćinu zwisowace mjeńšinowe spěchowanje delnjoněmčiny, kaž ministerstwo zdźěla.

Kamjenski zwjazk počesćeny

Krótkopowěsće (27.11.15)

Freitag, 27. November 2015 geschrieben von:

W Hornjej Łužicy wostać

Budyšin. Demografiska změna w Hornjej Łužicy bě tema konferency „Wuwićowe perspektiwy na wsy“ dźensa w Budyskim Kamjentnym domje. Wjac hač 70 wobdźělnikow diskutowaše wo idejach, wotchad ludźi z Łužicy spomalić. Zakład konferency bě naprašowanje mjez młodostnymi w Zhorjelcu, Budyšinje, Wojerecach a na wsach Hornjeje Łužicy.

W nocy žane pjenjezy

Zhorjelc. Pjenježne awtomaty lutowarnje Zhorjelskeho wokrjesa wostanu wot 20 hodź. do 7.30 hodź. zawrjene. Lutowarnja reaguje tak na nadpad z rozbuchlinu w Mikowje pola Niskeje. Nócna posłužba njebudźe mjez druhim móžna w Rěčicach, Hamorje, Rychbachu a Zhorjelcu kaž tež we Wopakej a dalšich filialach Zhorjelskeho wokrjesa.

Wažne dźěło přez mjezu

Praha/Drježdźany. Čěske regiony Karlovy Vary, Ústí nad Labem a Liberec su ze Swobodnym statom Sakskej wosebite zrěčenje podpisali. Po nim móža nětko čěske kaž tež němske wuchowanske ambulancy we woběmaj krajomaj swobodnje skutkować. To polěpša strowotniske zastaranje, mjez druhim blisko statneje mjezy zranjenych sněhakowarjow.

Krótkopowěsće (26.11.15)

Donnerstag, 26. November 2015 geschrieben von:

Škit mjeńšin rozjimali

Berlin. Mjeńšinowa rada w Němskej chce zwisk k Zwjazkowej radźe zesylnić. Na to dojednachu so zastupnicy Danow, Frizow, Sintow a Romow a Serbow, kotřiž radźe přisłušeja, wčera w Berlinje. Rozjimali su tež stejišćo wobłukoweho do­jednanja wo škiće mjeńšin a klětuše dźěłowe ćežišća, zdźěli mjeńšinowy sekre­tariat. Zetkanju přizamkny so dźensa konferenca.

Budyski zawod nominowany

Drježdźany. Mjez třomi móžnymi kandidatami za lětuše mjeztym 21. Drježdźanske marketingowe myto je tež Budyski zawod za twar pjecow DEBAG. Nimo toho smě so Wojerowski frizerski salon Haarschneider počesćenja nadźijeć, kaž ze zdźělenki Drježdźanskeho marke­tingoweho kluba wuchadźa. Myto spožča 2. decembra w Drježdźanach.

Pytaja bydlenja za ćěkancow

Krótkopowěsće (25.11.15)

Mittwoch, 25. November 2015 geschrieben von:

Nowa kniha wušła

Varnsdorf. „Druhe swěty“ rěka nowa čěskorěčna kniha Róže Domašcyneje, kotrejež předstajenje dožiwi minjeny pjatk něhdźe 30 zajimcow we Varnsdorfskej měšćanskej knihowni. Je to 64. publikacija knihownje. Milan Hrabal je z wjacorych zběrkow spisowaćelki zestajał bajki, basnje, eseje a druhe teksty. Kniha móžeše wuńć z podpěru Čěsko-němskeho fondsa přitomnosće a města Varnsdorfa.

Statny sekretar na wopyće

Pančicy-Kukow. Na přeprošenje zapósłanca CDU w Sakskim krajnym sejmje Alojsa Mikławška je statny sekretar w kultusowym ministerstwje dr. Frank Pfeil dźensa Łužicu wopytał. Mjez druhim pobyštaj wobaj w spěchowanskej šuli­ klóštra Marijineje hwězdy w Pančicach-Kukowje, hdźež wuknje 34 dźěći.

Bamž do Afriki lećał

Krótkopowěsće (24.11.15)

Dienstag, 24. November 2015 geschrieben von:

Bydlenje ministra nadpadnjene

Lipsk (dpa/SN). Bydlenje sakskeho justicneho ministra Sebastina Gemkowa (CDU) w Lipsku su minjenu nóc z butrowej kisalinu nadpadnyli. Pozadki njejsu dotal hišće jasne, policija zdźěli. Njeznaći rozbichu wokno bydlenja z kamjenjemi a ćisnychu na to kisalinu do bydlenja. 37lětny minister bě za čas nadpada ze swojej mandźelskej doma.

Ćěkancy do dźiwadła prošeni

Radebeul. Sakske krajne jewišća su ćěkancow přichodny pjatk do Radebeulskeho dźiwadła přeprosyli, zo bychu tam generalku rejwanskeho dźiwadła „Momo“ po romanje Michaela Ende sobu dožiwili. Prapremjera je za sobotu planowana, kaž dźiwadło zdźěla. Inscenacija je tak zapołožena, zo ju tež ludźo z druhich kulturnych kruhow derje rozumja.

Wabjenje nic bjez čěšćiny

Krótkopowěsće (23.11.15)

Montag, 23. November 2015 geschrieben von:

Wysoke počesćenje Łužičanomaj

Drježdźany. Wjelelětny předsyda towarstwa Iniciatiwa dźěći z Černobyla Georg Tietzen z Kamjenca a prelat Hubertus Comak ze Zhorjelskeje diecezy staj mjez dwanaće wosobami, kotrež sakski ministerski prezident Stanisław Tilich (CDU) zajutřišim ze Zwjazkowym zasłužbowym rjadom za přikładne skutkowanje na powšitkowne dobro počesći.

Prěnička Měrćina Wjenka wušła

Budyšin. Po dołhim času njesprócniweho pisanja předleži w LND prěnička prozy Měrćina Wjenka z titulom „Stary dom“. Wjenk słuša do kruha wjele lubjacych młodych pisacych, rěka z nakładnistwa. Lěta 2010 měješe swoje prěnje knižne wozjewjenje w rjedźe za teksty młodych awtorow „Paternoster“­. Wjenkowa kniha tež jako e-book wuńdźe.

Srjedu w Praze protestuja

Anzeige

  • 21. jolka-swjedźeń w Nuknicy je nimo. Štož zwostanje su dopomnjenki na rjany žortny a zabawny wječor w Nukničanskej Brězanec bróžni. Někotre impresije serbskeho wječora w Nuknicy, kotrež je naša fotografowka-wolontarka Hanka Šěnec zhotowiła, wam tule
  • Serbske Nowiny-LND-Tuchmacherstr. 27 02625 Bautzen: Jolka 12.01.2019
  • Serbske Nowiny-LND-Tuchmacherstr. 27 02625 Bautzen: Jolka 12.01.2019