Zwjazkowa kanclerka Merkel: Wjace lěpšinow hač mankow

Brüssel (dpa/SN/K). Cyłych 17 hodźin su šefojo 19 statow a knježerstwow krajow euroskupiny w belgiskej stolicy wuradźowali, doniž njejsu so na swojim wurjadnym wjeršku wo tym dorěčeli, kak hoberskeje zadołženosće Grjekskeje dla napřećo njej postupować. Wobdźělnicy dojednachu so jednomyslnje wo wobšěr­- nym pakeće lutowanja a reformow, kaž šef wjerška Donald Tusk dźensa rano wozjewi. Po nowym pomocnym programje pósćelu do Athena w přichodnych třoch lětach dalše 82 do 86 miliardow eurow podpěrnych srědkow. Za to dyrbi so Grjekska zawjazać, zo reformy zeskutkowni, mjez druhim nastupajo rentowy system a nadhódnotowy dawk.

Berlin (dpa/SN). Přiwisnicy wotwoleneho załožerja a dotalneho předsydy AfD Bernda Luckeho chcedźa po informacijach medijow nowu stronu załožić. Wotpowědny dokument su wšěm čłonam towarstwa „Weckruf 2015“ připósłali, kaž sćelak SWR rozprawja. W towarstwje hromadźa so liberalno-konserwatiwne mocy. Mnozy z nich, kaž Lucke sam, su mjeztym z AfD wustupili. Hižo přichodnu njedźelu chcedźa z něhdźe 70 ludźimi nowu stronu załožić. Lucke bě na stronskim zjězdźe 4. julija swojej kontrahentce Frauke Petry w boju wo móc podležał. Wot toho časa je strona dźesać procentow čłonow zhubiła a je tež w nahladnosći wolerjow jasnje wosłabnyła. Při wólbach zwjazkoweho sejma by strona tuchwilu runje hišće tři procenty dóstała.

Spušćejo so na swój nawigaciski nastroj je kolesowar w delnjofrankskim Wildfleckenje po wojerskim zwučowanišću jězdźił, jako tam runje třělachu. Dowolnik měješe koče zbožo: Wojak Zwjazkoweje wobory 35lětneho zadźerža. Na třělnišću wobsteješe tón čas najwjetši smjertny strach, kaž zamołwići zdźěleja. Muž chcyše sej z kolesom wulećeć. Dokelž so w kónčinje njewuznawaše, nastaji sej swój nawi. Policija jemu pomhaše, wojerske zwučowanišćo zaso wopušćić.

Peter Bauer je nowy swětowy mišter w spěšnofałdowanju kartonow pizzy. 27lětny je so sobotu na swětowych mišterstwach w porynsko-pfalcskej wsy Irsch přećiwo 20 konkurentam ze sydom krajow přesadźił. Wušiknje a spěšnje fałdowaše wón 13 tyzow w jednej mjeńšinje. Bauer bě hladajo na swój wuspěch překwapjeny: „Z tym njejsym ani ličił.“

Mostowe myto spožča Pólce

Zhorjelc (dpa/SN/ch). Mjezynarodne Mostowe myto europskeho města Zhorjelca/Zgorzeleca spožča lětsa 53lětnej pólskej spisowaćelce Olze Tokarczuk. Jeje literarne tworjenje rozšěrja wid na literaturu w srjedźnej a wuchodnej Europje, zwurazni minjeny pjatk prezident Mostoweje towaršnosće Willi Xylander. W romanach, esejach a krótkoformach twari wona literarne mosty mjez ludźimi, kulturami a generacijemi, přede­wšěm mjez tymi w třikrajowym róžku Němskej, Pólskej a Čěskej. Mostowe myto­ – lětsa přepodadźa je 4. decembra w Zhorjelskim Gerharta Hauptmannowym dźiwadle – spožčeja wot lěta 1993 wosobinam, kotrež maja zasłužby při wujednanju a dorozumjenju w Europje.

Christopher street day wotměli