Policija (28.03.24)

Donnerstag, 28. März 2024 geschrieben von:

Dweju paduchow lepili

Kamjenc. Hnydom dweju paduchow su wutoru w Kamjenskej kupnicy lepili. Dopołdnja spytaše 39lětny Uzbeka słód­čizny w hódnoće 75 eurow pokradnyć. Při­stajeny kupnicy tole wobkedźbowaše a muža hromadźe z kuražěrowanym kupcom zadźerža. Podhladny so wjacore razy wutorhnyć spyta a woběmaj z namocu hrožeše. Jimaj pak so poradźi, jeho tak dołho kruće dźeržeć, doniž policija njepřijědźe. W druhim padźe je popoł­dnju 35lětny pólski staćan spytał, kofej w hódnoće 140 eurow pokradnyć. Tež jeho při tym wobkedźbowachu a zadźeržachu, jako chcyše kupnicu bjez zapłaćenja wopušćić. Zastojnicy Kamjenskeho policajskeho rewěra we woběmaj padomaj wotpowědne wozjewjenja wupisachu. Kriminalisća padaj přewzachu.

Policija (27.03.24)

Mittwoch, 27. März 2024 geschrieben von:

Paduchow lepili

Wojerecy. W kupnicy při Kamjenskim kolenje we Wojerecach su zaso raz paduchow lepili. Sobudźěłaćer informowaše póndźelu popołdnju policiju wo podhladnym poriku. Zastojnicy narěčachu wobeju, jako běštaj wonaj nimo kasy šłoj. Kaž so wukopa, staj wobaj wjacore bleše palenca w cyłkownej hódnoće něhdźe 700 eurow w swojej drasće schowałoj. Jednaše so wo 31lětneho muža a wo 30lětnu žonu z Rumunskeje. Pokradnjene wěcy wostachu hnydom w kupnicy. Město toho dóstaštaj paduchaj chłostanske zdźělenje. Policija pad nětko dale přepytuje.

Policija (26.03.24)

Dienstag, 26. März 2024 geschrieben von:

Moped manipulowany był

Ćisk. W nocy na póndźelu je wodźer ­mopeda w Ćisku spytał, so policajskej kontroli wuwinyć. Młodostny bě wobsadce policajskeho awta na Budyskej dróze napadnył, přikaz zastać wón ignorowaše. Na nawsy pak policisća 16lětneho dosahnychu. Spěšnje so wukopa, čehodla bě wón ćeknył. Moped njebě zawěsćeny a technisce manipulowany. Za to wužiwane dźěle pochadźachu po wšěm zdaću z padustwow. Nimo toho młodostny scyła žanu jězbnu dowolnosće njewobsedźeše. Dale jěć wón tuž hižo njesmědźeše. Jězdźidło policisća sćazachu.

Policija (25.03.24)

Montag, 25. März 2024 geschrieben von:

Hydrawliski hamor pokradnyli

Nadźanecy. Bager w Nadźanecach (Nadelwitz) pola Budyšina bě w nocy na sobotu cil paduchow. Wot mašiny wottwarichu woni hydrawliski hamor a něhdźe 200 kilogramow ćežki dźěłowy grat wottransportowachu. Při tym nasta něhdźe 6 000 eurow škody.

Policija (22.03.24)

Freitag, 22. März 2024 geschrieben von:

Njezbožo z třomi zranjenymi

Bukecy. Na Karla Marxowej w Bukecach su srjedu popołdnju tři awta do so zrazyli. Při tym so jedna wosoba zrani. 20lětny wodźer VW Polo zajědźe, prawdźe­podobnje dokelž njebě kedźbował, na před nim jěducy Seat. Tón suny so tohodla do Fiata před nim jěduceho 54lětneho. Při njezbožu so sobujěduca w VW zrani. Njezbožo zawinowa wěcnu škodu něhdźe 15 000 eurow. Po tym zo bě policija njezbožo registrowała, ­rumowaše nadróžna słužba Seat a Fiat z puća. Wonej­ běštej wobě dospołnje skónco­wanej.

Policija (21.03.24)

Donnerstag, 21. März 2024 geschrieben von:

Drjewo zapalili

Nowa Wjeska. Njeznaći su wutoru składowanišćo drjewa na Hrańčanskej dróze w Nowej Wjesce zapalili. Woheń składowane drjewo kaž tež składowanišćo same zniči. Horcota wohenja wobškodźeše nimo toho wokna a durje bliskeho domskeho. Wohnjowi wobornicy wokolnych wsow woheń zhašachu. Wěcnu škodu trochuja na někak 10 000 eurow. Kriminalna posłužba pad nětko přepytuje. Wo motiwach skućićelow nětko hišće ničo prajić njemóža.

Policija (20.03.24)

Mittwoch, 20. März 2024 geschrieben von:

Kolesowarka smjertnje znjezbožiła

Běła Woda. Tragiske wobchadne njezbožo sta so póndźelu dopołdnja w Běłej Wodźe. 38lětny wodźer nakładneho awta chcyše z pódlanskeje na hłownu dróhu wotbočić, njewobkedźbowaše pak předjězbu kolesowarki, kotraž wotlěwa při­jědźe. 85lětna zajědźe do nakładneho awta, padny a so ćežko zrani. Žonu dowjezechu z helikopterom do chorownje, hdźež wona we wječornych hodźinach na sćěhi swojich zranjenjow zemrě.

Policija (18.03.24)

Montag, 18. März 2024 geschrieben von:

Koleso tank wobškodźiło

Budyšin. Njeznaty wodźer wosoboweho awta je sobotu na awtodróze A 4 mjez Budyšinom a Wósporkom zepěranske koleso swojeho připowěšaka zhubił. Za nim jěduca 44lětna wodźerka nakładneho awta je tole přepozdźe spóznała a přez koleso zajědźe. Při tym bu tank jězdźidła wobškodźeny, tak zo diesel wuběža. Wohnjowi wobornicy tank prowizorisce zalěpichu. Specialna firma dyrbješe nakładne awto wotwlec. Škoda wučinja něhdźe 500 eurow.

Policija (15.03.24)

Freitag, 15. März 2024 geschrieben von:

Wobhrodźenje skóncował

Rakecy. Wěcna škoda we wobjimje ně­hdźe 3 000 eurow je wutoru popołdnju při wobchadnym njezbožu w Rakecach nastała. Nakładna awto jědźeše ze směra B 96 po Dwórnišćowej. Jako šofer nalěwo wotboči, šmórny so zadni dźěl jězdźidła wobhrodźenja, kotrež ma pěškow před nimo jěducymi awtami škitać. Na zbožo so žane wosoby zranili njejsu. Wodźer nakładneho awta dyrbi pokutny pjenjez zapłaćić, kaž Zhorjelska policajska direkcija informuje.

Policija (13.03.24)

Mittwoch, 13. März 2024 geschrieben von:

Na křižowanišću prasnyło

Zejicy. Jedna zranjena wosoba a tójšto wěcneje škody je wuslědk wobchadneho njezboža póndźelu rano w Zejicach. 39lětna žona bě tam na statnej dróze S 101 ze swojim Opelom z Hornjeho Wujězda přijěła. Na křižowanišću k S 100 wona po wšěm zdaću na hłownej dróze jěducy Škoda tohorunja 39lětneje žony přewidźa a do njeho zrazy. Dokelž bě zražka chětro sylna, suny so Škoda do Mercedesa, kiž na křižowanišću čakaše. Wodźerka Opela so snadnje zrani. Wuchowanske mocy žonu ambulantnje ­zastarachu. Přiwołani wohnjowi wobornicy so wo wuběžany bencin a wolij starachu. Po informacijach policije nasta něhdźe 25 000 eurow škody.

Serbska debata

Neuheiten LND