Policija (30.05.18)

Mittwoch, 30. Mai 2018 geschrieben von:

Po njezbožu w chorowni zemrěła

Běła Woda. Při wobchadnym njezbožu wčera popołdnju w Běłej Wodźe je so 90lětna žona tak ćežko zraniła, zo pozdźišo zemrě. Jako chcyše dróhu pře­prěčić, zajědźe 53lětna z Mitsubishijom do njeje. Starušku, kotraž poćerpje ćežke zranjenja na hłowje, dowjezechu do chorownje, hdźež wona wudycha.

Policija (29.05.18)

Dienstag, 29. Mai 2018 geschrieben von:

Sobu swjećić chcył

Klětno. Na priwatny swjedźeń w Klětnjanskim klubje chcyše zawčerawšim rano 14lětny sebje samoho přeprosyć. Po tym zo běchu jeho napominali so zminyć, započa młodostny z nožom wokoło so machać a je při tym hosća snadnje zranił. Policija 14lětneho pozdźišo w bliskosći lepi a naměri pola njeho 0,7 promilow alkohola w kreji.

Policija (28.05.18)

Montag, 28. Mai 2018 geschrieben von:

Baner při nakupowanišću powěsnyli

Budyšin. Wosrjedź Budyskeho nalěća dyrbjachu sobotu popołdnju policiju do centruma města wołać. Wjacore njeznate wosoby běchu na wonkownej sćěnje Centera na Žitnych wikach 24 metrow dołhi baner powěsnyli. Nimo toho zapalichu tam kurjace praskotaki. Kur ćehnješe do přewětrjenskeje připrawy nakupowanišća. Hač je techniska připrawa škodu poćerpjeła, njeje znate. Policija wuslědźi na to 20lětneho, kiž bě za tule akciju sobu zamołwity.

Policija (25.05.18)

Freitag, 25. Mai 2018 geschrieben von:

Konjacy zapřah twochnył

Njedźichow. Bjez kontrole bě zawčera­wšim připołdnju konjacy zapřah w Njedźichowje po puću. 65lětny wobsedźer bě swojej konjej runje před wóz zapřahnył, jako so jedyn z njeju stróži a poda so hromadźe z tamnym konjom a wozom po Kulowskej dróze do směra na zwjazkowu dróhu B 97. Tam powali zapřah wobchadne znamjo. Připadnje přitomnemu znatemu wobsedźerja brunačow so po­radźi zapřah zadźeržeć. Ludźo so při ­„wulěće“ na zbožo žani zranili njejsu, ­jedyn z konjow so při klamje zrani.

Policija (24.05.18)

Donnerstag, 24. Mai 2018 geschrieben von:

Wobskorženeho zajeli

Kamjenc. Dokelž so 32lětny wobskorženy na sudnistwje přizjewił njebě, byrnjež jeho pisomnje napominali, da justica jeho z wukazom zajeća pytać. Zastojnicy nańdźechu muža zawčerawšim rano na Jěžowskej dróze w Kamjencu, hdźež jeho zajachu. Sudnik na to rozsudźi, zo ma wón hač do spočatka sudniskeho jednanja w jastwje wostać. Tajki njedobrowólny přebytk za lěsycami móhł sej muž zalutować, by-li, kaž wot sudnistwa žadane, na prěnim jednanskim terminje přitomny był.

Policija (23.05.18)

Mittwoch, 23. Mai 2018 geschrieben von:

Skućićelow lepili

Biskopicy. Mužow, kotrajž chcyštaj za­wčerawšim připołdnju w Biskopicach metal kradnyć, je policija lepiła. Skućićelej podaštaj so do njezamknjeneho domu, kotrež ma so spotorhać, a přihotowaštaj sej wšelake twarske dźěle z mosaza, kopora a drohowocla, zo bychu je pozdźišo wotwjezli. Jeju klepanje pak nimoducemu swědkej napadny, na čož tón policiju zazwoni. Zastojnicy běchu spěšnje na městnje a přepytachu twarjenje, hdźež 37lětneho a dźesać lět staršeho komplicu skónčnje nańdźechu. Wonaj běštaj so w ćmowej rumnosći schowałoj w nadźiji, zo policisća jeju njenamakaja. Zastojnicy zwěsćichu jeju personalije a přihotowanu rubiznu zawěsćichu. Wozjewjenka pospytneho padustwa dla je mužomaj nětko wěsta.

Policija (22.05.18)

Dienstag, 22. Mai 2018 geschrieben von:

Do wobchoda zajěł

Wulka Dubrawa. Do murje kuchinskeho studija we Wulkej Dubrawje je njedźelu dopołdnja 33lětny ze swojim awtom zrazył. Najskerje slepjaceho słónca dla bě wón w kružnym wobchadźe kontrolu nad BMWjom zhubił. Při zražce so wukładne wokno wobchoda rozbi. Škoda wučinja něhdźe 10 000 eurow.

Policija (18.05.18)

Freitag, 18. Mai 2018 geschrieben von:

Strašnje parkował

Ohorn. Njewšědne parkowanišćo wupytał je sej zawčerawšim rano 32lětny wodźer nakładneho awta na awtodróze A 4 blisko Ohorna. Dokelž běchu na parkowanišću Rödertal wšitke městna wobsadźene, wosta wón ze swojim jězdźidłom 200 metrow dale do směra na Drježdźany w nabóčnym pasmje stejo, zo móhł swoju předpisanu přestawku dodźeržeć. Wobsadka policajskeho awta šofera pozdźišo wubudźi, kazajo jemu, zo ma ­w Ohornje z awtodróhi jěć a tam Lkw wotstajić. Šofer drje změje nětko pokutu płaćić. Dokelž je wobchad na A 4 w minjenych dźesać lětach jara přiběrał, parkowanske městna mjez Drježdźanami a Zhorjelcom dawno wjace njedosahaja.

Policija (17.05.18)

Donnerstag, 17. Mai 2018 geschrieben von:

Wopity z kolesom jěł

Wojerecy. Chětro njewěsće bližeše so zawčerawšim wječor we Wojerecach kolesowar wobsadce policajskeho awta. Jako zastojnicy kontrolowachu, hač je scyła kmany z kolesom jěć, napadny jim jeho „chorhojčka“. Při tesće zwěsćichu, zo měješe­ 45lětny 1,98 promilow alkohola w kreji. Hranica 1,6 promilow za kolesowarjow bě tuž jasnje překročena. Policisća jemu dalšu jězbu zakazachu a přikazachu, zo ma krej wotedać. Muž změje so nětko wopiłstwa w na­dróžnym wobchadźe dla zamołwić.

Policija (16.05.18)

Mittwoch, 16. Mai 2018 geschrieben von:

Wospjet pod wliwom drogow jěł

Prěčecy. Poprawom měješe wobsadka policajskeho awta zawčerawšim popoł­dnju hinaši nadawk, ale po puću zetka wona při kružnym wobchadźe blisko Prěčec „stareho znateho“ w jeho BMWju. Hakle před něšto tydźenjemi běchu zastojnicy 22lětneho muža kontrolowali a zwěsćili, zo bě wón drogi brał. Tuž nětko znowa zadźeržachu. Tež tónraz steješe wón wočiwidnje pod wliwom drogow, štož wotpowědny test wobkrući. Młody muž potajkim ničo přinawuknył njeje. Dalšu jězbu jemu policisća zakazachu. Dyrbjało-li tež přepytowanje kreje drogi wobkrućić, hroža njepolěpšomnemu dwaj dypkaj w Flensburgu, tysac eurow pokuty a tři měsacy zakaz jězdźenja.

Anzeige