Policija (14.08.18)

Dienstag, 14. August 2018 geschrieben von:

Susod wina njebył

Hbjelsk. Wuhladawši w haće na swojej ležownosći mortwej rybje wołaše wobydler Hbjelska njedźelu dopołdnja policiju, dokelž tukaše, zo bě susod snano škódnu maćiznu do hata kidnył. Zastojnicy tuž proby wody sobu wzachu. Ničo pak na to njepokazowaše, zo móhł susod z tymle „padom“ něšto činić měć. Jako wobsedźer mjenujcy wjace powětra do hata wjedźeše, běchu ryby nadobo widźomnje agilniše. Dwěmaj bě w ćopłej wodźe po wšěm zdaću kislik wušoł.

Policija (13.08.18)

Montag, 13. August 2018 geschrieben von:

Haruja a myla nócny měr

Budyšin. Hižo wot spočatka lětnich prózdnin so w Budyšinje na naměsće před Němsko-Serbskim ludowym dźiwadłom wšědnje wjetše skupiny ludźi zhromadźuja a tam haruja. W nocomaj na minjenej pjatk a sobotu zwěsćichu tam stajnje něhdźe 40 wosobow, kotřiž nócny měr bliskich wobydlerjow z haru a hudźbu mylachu. Přiwołana policija zwěsći identitu zwjetša młodych ludźi. Pola někotrych z nich namakachu snadne mnóstwo drogow. Tohodla kaž tež nje­dodźerženja nócneho měra dla změja so woni nětko disciplinarisce zamołwić. Hakle wokoło třećeje hodźiny zaćahny na naměsće před NSLDź zaso měr. Wróćo wostachu rozbite bleše a dalše par­tyjowe wotpadki. Za wobydlerjow bliskich by­dlenskich domow woznamje­njeja nócne hejsowanja přiběrace poćeženje, čehož­dla woni wobstajnje policiju in­formuja.

Policija (10.08.18)

Freitag, 10. August 2018 geschrieben von:

W prózdnej kupnicy so paliło

Wojerecy. Na Hasy měra we Wojerecach dyrbjachu wčera kameradojo tamnišeje powołanskeje wohnjoweje wobory ně­hdźe w 17 hodź. w prózdnej kupnicy wosrjedź města woheń hašeć. Hižo před tydźenjomaj bě so tam paliło. Byrnjež so z twarjenja chětro kuriło a płomjenja sapali, móžachu je wobornicy w běhu dweju hodźin zhašeć. Po zdaću je woheń něchtó zamiškrił.

Do kontejnera so zadobyli

Njebjelčicy. W Njebjelčicach su njeznaći zawčerawšim w nocy z twarskeho kontejnera rjećazowe piły a njebozowe mašiny w hódnoće 2 000 eurow pokradnyli.

Policija (09.08.18)

Donnerstag, 09. August 2018 geschrieben von:

Izolowanje domskeho zhašeli

Porchow. W Porchowje je so wčera w nocy na Nakromnym sydlišću izolowanje domskeho paliło. Něhdźe štyri kwa­drat­nych metrow styropora steješe w płomjenjach. Kameradojo Porchowskeje wohnjoweje wobory woheń zhašachu.

Dźěłaćer granatu našoł

Slepo. Při kopanskich dźěłach je dźěłaćer w Slepom na Grodkowskej dróze wutoru připołdnju granatu z druheje swětoweje wójny našoł. Specialisća ju wotwjezechu.

Policija (08.08.18)

Mittwoch, 08. August 2018 geschrieben von:

Lawba so wotpaliła

Šěrachow. Na Winterbergskej w Šěrachowje je so wčera popołdnju lawba paliła­. Torhaceho wětřika dla wobsteješe strach, zo płomjenja na susodne ležownosće přeskoča. Tomu pak zamó něhdźe 50 kameradow dobrowólnych wohnjowych woborow mjez druhim ze Šěra­chowa, Korzymja, Rozwodec a Chróstawy kaž tež Budyskeje powołanskeje wobory zadźěwać. Lawba so přiwšěm wotpali.

W lěsu woheń hašeli

Njedźichow. Wohnjowe wobory z Nje­dźi­chowa a wokoliny su wčera popo­ł­dnju při S 92 w lěsu mjez Njedźichowom a Lěsku (Lieske) woheń hašeli. Płonina ně­hdźe 100 króć 50 metrow pak bu zničena.

Policija (07.08.18)

Dienstag, 07. August 2018 geschrieben von:

Hižo zranjeny z awtom znjezbožił

Halštrow. Po tym zo bě sej muž wčera wječor w Halštrowje z piłu do ruki rěznył, sydny so do awta a jědźeše k lěkarjej. Zranjenja dla pak zhubi w lěwicy měšćanskeho wobkruha we wysokosći nakupowanišća kontrolu nad wodźidłom a zrazy do štoma. Zawołani wohnjowi wobornicy z Halštrowa a Krěpjec městnosć njezboža zawěsćichu. Šofera je wuchowanska słužba zastarała.

Pola juwelěra kradnyli

Wojerecy. Na Wojerowskim Łužiskim naměsće běchu so njeznaći w nocy na póndźelu do juwelěroweho wobchoda zadobyli. Rozbichu tam witriny a pokradnychu časniki a debjenki. Škoda wučinja wjacore tysacy eurow. Hódnotu rubizny ma mějićel wobchoda hišće zwěsćić.

Policija (06.08.18)

Montag, 06. August 2018 geschrieben von:

Z třomi promilemi chětro wopity

Leppersdorf. Blisko Leppersdorfa, na dróze do směra na Kleinröhrsdorf, je wčera něhdźe w 2 hodź. chětro wopity muž z kolesa padnył. Jako wot awtoweho šofera zawołani policisća 29lětneho kontrolowachu, woni zwěsćichu, zo měješe tón 3,22 promilow alkohola w kreji.

Policija (03.08.18)

Freitag, 03. August 2018 geschrieben von:

Lkw dale jěć njesměł

Słona Boršć. Policija je na wotpočnišću Hornja Łužica šoferej Lkw-ja z Litawskeje dalejězbu zakazała. 55lětny bě z trjeba­nymi awtami po puću. Borzdźidła Lkw-ja pak běchu skóncowane, wóska zezhibowana, jedne pjero złamane a kolesyna manipulowana. Nimo toho bě připo­wěšak wo tři tony přećeženy.

Policija (02.08.18)

Donnerstag, 02. August 2018 geschrieben von:

Jastwu zadźěwał, dalšu pokutu dóstał

Spale. Swojemu zajeću móžeše 51lětny w Spalach předwčerawšim zadźěwać. Poprawom běchu policisća k njemu jěli, zo bychu jeho njepłaćeneje pokuty dla zajeli. Wón pak žadanu sumu na městnje zaruna a njetrjeba tuž do jastwa. „Bohužel“ pak zastojnicy pytnychu, zo měješe pytany, kiž bě so runje z awtom nawróćił, „chorhojčku“. Test wuda 0,5 promilow alkohola w kreji. Nětko budźe muž dyrbjeć znajmjeńša 500 ­eurow płaćić, měsac nóžkować a dóstanje dypk w Flensburgu.

Policija (01.08.18)

Mittwoch, 01. August 2018 geschrieben von:

Zastojnicy z wulkim wuspěchom

Krušwica. Hnydom tři pokradnjene awta w cyłkownej hódnoće něhdźe 75 000 eurow zawěsćić a třoch pozdatnych paduchow zajeć móžeše policija wčera rano we wokolinje Běłeje Wody. W Mužakowje spyta so šofer BMWja kontroli wuwinyć. Policisća za nim smalachu a nańdźechu awto z Choćebuskej značku skónčnje w měsće wotstajene. Krótko na to poradźi so zastojnikam w Krušwicy, BMW X 5 zadźeržeć. Wodźer chcyše kontrolu přełamać. Policisća awto tohorunja z Chćebuskej značku zawěsćichu a šofera a sobujěduceho zajachu. Kaž so wustaji, bu­štej wobě jězdźidle hakle něšto hodźin do toho wikowarjej awtow w Gołynku (Gallinchen) pokradnjenej. Jenož mjeńšiny pozdźišo zawěsći policija w Běłej Wodźe Mercedes Sprinter. Berlinjanka bě ju informowała, zo bu awto pokradnjene a je po puću do směra na Pólsku. Z pomocu techniki móžachu zastojnicy jězdźidło lokalizować a paduchow zajeć.

Anzeige