Policija (13.04.16)

Mittwoch, 13. April 2016 geschrieben von:

Paduši sej lochko měli

Nowa Wjes. Chětro dołho darmotnje z awtom jězdźić móža nětko njeznaći, kotřiž su w běhu minjeneho kónca tydźenja w Nowej Wsy w gmejnje Šprjewiny Doł něhdźe 2 000 litrow diesela pokradnyli. Kaž policija zdźěli, bě ćěriwo w štyrjoch połnje natankowanych twarskich mašinach, kotrež stejachu bjez dohlada blisko statneje dróhi S 130. Přidatnje lochko sej paduši mějachu, dokelž njeběchu wěka tankow zamknjene. Wěcna škoda wučinja 2 000 eurow.

Policija (12.04.16)

Dienstag, 12. April 2016 geschrieben von:

Alkohol a žadyn kónc

Budyšin. Drogi a alkohol su přičiny, kotrež wjedu w nadróžnym wobchadźe najčasćišo k njezbožam. Loni zregistrowachu we wokrjesomaj Budyšin a Zhorjelc dohromady 334 zražkow, při kotrychž běchu wodźerjo jězdźidłow pak alkohol pili abo drogi brali. Lětuša statistika drje budźe podobna. Jeničce zawčerawšim dyrbješe so policija w Hornjej Łužicy z dźewjeć tajkimi padami zaběrać. Tak stachu so wjacore wobchadne njezboža, zawinowane wot wopitych šoferow. Dalšich lepichu zastojnicy při wobchadnych kontrolach. We wšěch padach čakaja na potrjechenych­ čućiwa pjenježna pokuta a dypki w Flensburgu.

Policija (11.04.16)

Montag, 11. April 2016 geschrieben von:

Mlokowe awto znjezbožiło

Žarki. Při wobchadnym njezbožu dźensa dopołdnja mjez Wósporkom a Žarkami je z dotal njeznateje přičiny mlokowe awto­ znjezbožiło. Při tym so jězdźidło po­wróći, wulki dźěl mloka wuběža na łuku a do přirowa. Šofera dyrbjachu zra­njeneho do chorownje dowjezć. Rumowanja dla bě dróha dlěši čas zawrjena.

Policija (08.04.16)

Freitag, 08. April 2016 geschrieben von:

Narodnosće překročaca zwada

Zhorjelc. Na Marijinym naměsće w Zhorjelcu je so wčera wječor 15 ludźi wadźiło – werbalnje a ćělnje. Wobkedźbowacy zawołachu­ tuž policiju. Spěšnje přichwatani zastojnicy policajskeho rewěra kaž tež zwjazkoweje policije młodostnych, žony a mužow, změrowachu. Započało bě so rozestajenje ze zwadu w bydlenju na Schillerowej, hdźež přebywachu tež wjacore němske a pólske młodostne. Při swjećenju dóstachu so wjacori požadarjo azyla do rozkory, kotraž pozdźišo na Marijinym naměsće eskalěrowaše. Policija zwěsći personalije 18 wobdźělenych. Žony a mužojo w starobje 14 do 30 lět běchu němskeje, pólskeje, syriskeje, libanonskeje, albanskeje a kosowskeje narodnosće. Policija zakaza jim přistup na naměsto. Při roze­stajenju zranjenaj 15lětna a 16lětny dyrbještaj so lěkarsce zastarać dać.

Policija (07.04.16)

Donnerstag, 07. April 2016 geschrieben von:

Wobchad kontrolowali

Budyšin. Na třoch městnach je policija zawčerawšim, wutoru, w Budyšinje wobchad kontrolowała, a to na Mosće měra, na Mjasowych wikach a na Zeppelinowej. W běhu štyri hodźiny trajaceje akcije zadźeržachu zastojnicy dohromady 15 wodźerjow awtow, dokelž běchu woni zabyli so připasać. Pjećo dalši su při jězdźenju mobilny telefon wužiwali. Za jězdźenje bjez wěstotneho pasa předwidźa pokutny katalog 30 eurow warnowanskeho pjenjeza. Za wužiwanje mobilneho telefona dyrbja potrjecheni 60 eurow pokuty płaćić a dóstanu nimo toho dypk w Flensburgu.

Alkoholizowany z awtom jěł

Stróža. Dobry čuch měješe wobsadka policajskeho awta wutoru wječor w Stróži pola Rakec. Tam zadźeržachu 55lětneho wodźerja Golfa, kotrehož kontrolowachu. Při tym zastojnicy zwěsćichu, zo bě wón alkohol pił. Wotpowědny test wunjese 0,96 promilow alkohola w kreji. To budźe za 55lětneho droha naležnosć. Wón změje nětko znajmjeńša 500 eurow pokuty płaćić, njesmě měsac žane awto wodźić a dóstanje nimo toho dwaj dypkaj w Flensburgu.

Policija (06.04.16)

Mittwoch, 06. April 2016 geschrieben von:

Z psom za ćeknjenym pytali

Biskopicy. Z dotal njeznateje přičiny je wčera nawječor w Biskopicach wodźer Audija do parkowaceho Suzukija zrazył a jón do dalšeho awta, Jaguara, storčił. Zawinowar­ z Audijom ćekny. Swědcy pak sej čisło spomjatkowachu a policiju informowachu. Zastojnicy chcychu jeho na to doma wopytać, tam pak ani muža ani jeho awto njenańdźechu. Na to so tónle pad spěšnje po Facebooku roznjese. Dwě hodźinje pozdźišo so dalši swědcy přizjewichu, zo su pytany Audi namakali. Jeho wobsedźer pak bě dale zhubjeny. Tak započachu z policajskim psom za nim pytać. Byrnjež so chětro dešćowało, pos něhdźe dwaj kilometraj slědy čuchaše. Po wšěm zdaću bychu pytaneho na te wašnje namakali. Wón pak bě so mjeztym sam na policajskim rewěrje přizjewił.

Policija (05.04.16)

Dienstag, 05. April 2016 geschrieben von:

Awto a motorske fuk

Němcy. W času wot štwórtka wječora hač do njedźele připołdnja zadobychu so njeznaći w Němcach do zamkarnje při Kulowskim puću. Přepytujo rumnosće namakachu kluče transportera Mercedes Vito. Awto z čisłom BZ-CC 997 steješe na parkowanišću zawoda. Nimo toho pokradnychu skućićeljo štyri awtowe ko­lesa kaž tež ćmowe motorske Suzuki GSX-R 750­ z hamtskim čisłom OH-HY 2. Škodu­ trochuje wobsedźer zamkarnje na něhdźe 40 000 eurow.

Woheń bróžnju zničił

Wallroda. Dohromady něhdźe sto wo­hnjowych wobornikow wołachu dźensa rano k hašenju do Wallrody. Z dotal nje­znatych přičin bě tam krótko do 6 hodź. woheń w bróžni třistronskeho statoka wudyrił. Wobornicy drje tomu zadźě­wachu, zo płomjenja na susodny bydlenski dom přeskoča, bróžnja pak so do­społnje zniči. Tež wowcy w njej zahinychu. Z bagrom chcychu zbytki twarjenja potorhać, zo móhli wšitke płomjenja doskónčnje podusyć.

Policija (04.04.16)

Montag, 04. April 2016 geschrieben von:

Znjezbožił a ćeknył

Koblicy. Trochu njewšědne bě wobchadne njezbožo, kotrež sta so sobotu popołdnju na wokrjesnej dróze blisko Koblic do směra na Hórnikecy. Tam bě wodźer Toyoty w prawej křiwicy na lěwy bok puća zajěł a do telefonoweho sćežora prasnył, kotryž při tym padny a awto wobškodźi. Přiwšěm Toyota hišće tak fungowaše, zo muž z nim hač domoj dojědźe. Tam pak zastojnicy Wojerowskeho policajskeho rewěra jeho kaž tež wobškodźene jězdźidło wuslědźichu. 74lětny změje so nětko ćeknjenja z městna nje­zboža dla zamołwić.

Policija (01.04.16)

Freitag, 01. April 2016 geschrieben von:

Sněh njezboža zawinił

Porchow. Po wšěm zdaću bě sněh dźensa rano na tym wina, zo je k wjacorym njezbožam na zwjazkowej dróze A 4 mjez Drježdźanami a Zhorjelcom dóšło. Krótko po wosmich je wodźerka Opela mjez Ohornom a Porchowom do škitneho wobhrodźenja zajěła. Žona a jeje dźowka so na zbožo zraniłoj njejstej. Jenož něšto mjeńšin po tym sta so dalše njezbožo. Tónraz mjez Porchowom a Ohornom, jenož něšto metrow wot tamneje zražki zdalene. Tu je wodźer awta typa Fiat kontrolu nad jězdźidłom zhubił a prasny tohorunja do škitneho wobhrodźenja. Tež wón a sobujěduca njejstaj so zraniłoj. Do wobeju směrow zwjazkoweje dróhi dóńdźe ke krótkemu haćenju wobchada.

Policija (31.03.16)

Donnerstag, 31. März 2016 geschrieben von:

Ze sornikom so nasadźałoj

Tři Hwězdy. K njewšědnemu zasadźenju wołachu wutoru wječor sobudźěłaćerjow Techniskeho pomocneho skutka a zastojnikow awtodróhoweje policije do lěska při statnej dróze S 105 mjez Třomi Hwězdami a Słonej Boršću. 13lětnaj hólcaj wołaštaj tam wo pomoc. Kaž wonaj rozprawještaj, bě jeju sornik nadpadnył. Po wšěm zdaću běštaj hólcaj do toho­ stadło sornow wobkedźbowałoj a při tym sćerpnosć sornika strapacěrowałoj. Zranjeneju hólcow dowjezechu do chorownje. Policisća informowachu staršich a wzachu kolesy małeju dyrdomdejnikow sobu. Sornik bě so mjeztym dawno zminył.

Anzeige

  • 21. jolka-swjedźeń w Nuknicy je nimo. Štož zwostanje su dopomnjenki na rjany žortny a zabawny wječor w Nukničanskej Brězanec bróžni. Někotre impresije serbskeho wječora w Nuknicy, kotrež je naša fotografowka-wolontarka Hanka Šěnec zhotowiła, wam tule
  • Serbske Nowiny-LND-Tuchmacherstr. 27 02625 Bautzen: Jolka 12.01.2019
  • Serbske Nowiny-LND-Tuchmacherstr. 27 02625 Bautzen: Jolka 12.01.2019