Běła Woda (AK/SN). Armeja USA přepołoži kónc januara, spočatk februara wulke jednotki z belgiskeho Antwerpena do Pólskeje a budźe tež we Łužicy po puću. „To njeje swójska akcija Američanow, ale wuslědk wobzamknjenja wjerškowych zetkanjow NATO w lětach 2014, 2016 a 2018“, podšmórny Timothy Eydelnant, generalny konsul USA za Saksku, Saksko-Anhaltsku a Durinsku, wčera w Běłej Wodźe w přitomnosći wyšeho měšćanosty Torstena Pötzscha (Klartext).
Jednotki pojědu we wobłuku operacije „Atlantic Resolve“ wot Forta Rileyja w Kansasu, USA, do Pólskeje. „Zaměr lěta 2014 zahajeneje operacije, je zawěsćić zasadźensku hotowosć wójskow NATO we wuchodnej Europje. W Europje matej so měr a stabilita trajnje zawěsćić“, generalny konsul podšmórny. Kraje Baltikuma a Pólska čuja so wot Ruskeje wohrožene.