Marko Šiman skutkuje hižo 35 lět jako zapósłanc w parlamenće Sakskeje

Drježdźany (SN/MG). Marko Šiman je posledni zapósłanc Sakskeho krajneho sejma, kiž wot wšeho spočatka sobu skutkuje. Dohromady 35 lět je Šiman zapósłanc­ CDU z Budyskich kónčin w Drježdźanskim parlamenće. Wón móže so hišće derje na to dopominać, kak bě so wšitko započinało – tehdy, 27. oktobra 1990. Dokładnje 35 lět pozdźišo je Šiman nowinarjow do Drježdźanskeje Cyrkwje třoch kralow prosył. Na tamnišej swjedźenskej žurli běchu mjenujcy prěni krajny sejm skonstituowali.

Na posedźenja je Šiman z Trabantom jězdźił, druhdy tež ze železnicu. „Wot Budyšina do Drježdźan po mjezynarodnym zwisku“, wón praji. Tehdy bě ćah mjenujcy hišće z Przemyśla do Parisa jězdźił, po puću bě w stolicomaj Serbow a Sakskeje zastawał. Su to tajke wokomiki, na kotrež so dźensa 70lětny rady dopomina. Wón bě jedyn z tych, kiž „z tružnicy do parlamenta“ přińdźe. Do změny njebě ženje parlamentarisce dźěłał. Jeničce w zawodnej radźe bě wón do swojeho dźěła jako zapósłanc hižo skutkował, Šiman doda.