Namórnicy nětkow Moskwje zajeći
Pruwuja nětko kriminelny pozadk
Bonn/Berlin (dpa/SN). Po wčerawšim njeplanowanym přizemjenju knježerstwoweho lětadła zwjazkoweje kanclerki Angele Merkel (CDU) po puću na wjerškowe zetkanje G 20 w argentinskim Buenos Airesu da zwjazkowe knježerstwo po informacijach medijow tež móžny kriminelny pozadk podawka pruwować. Elektroniskeho defekta Airbusa A340-300 dla zawinowane přizemjenje w Kölnje/Bonnje nětko kriminalistisce předźěłuja. To rozprawja dźensa nowina Rheinische Post, powołaca so na informacije wěstotnych kruhow. Kaž ze stron knježerstwa rěkaše, přepytuja „do wšěch směrow“.
Wot Angele Merkel „najnazhonićiši kapitan lětarskeje hotowosće“ mjenowany pilot bě po informacijach nowiny wo dotal njesłyšanym defekće komunikaciskeho systema rěčał. Tajke něšto njeběchu dotal scyła za móžne měli. Kanclerka je na to přemyslowała, hač lět do Buenos Airesa dospołnje wotpraji.
„Pomjatk ludu“
To a tamne (30.11.18)
Pozdźišo diskwalifikowali su 258 běharjow połmarathona w Chinje. Kaž tamniše medije rozprawjeja, móžachu jim w juhochinskim měsće Shenzhen dopokazać, zo běchu na wubědźowanju skrótšenki wužiwali a tak wobšudźili. Na wjacorych městnach stejachu kamery, kotrež móža tež mjezwoča identifikować. Marathon je tam jara popularny. Bědźa pak so přiběrajcy z wobšudnistwami.
Želnosćiwy list zaběra tuchwilu policiju w schwabskim Schwäbisch Hallu. Anonymny spisar w nim přiznawa, zo je ze swojim awtom na parkowanišću kupnicy dalše wobškodźił. List z wjacorymi stami eurow bě njeznaty redakciji nowiny pósłał. Dotal pak so nichtó přizjewił njeje. Wobšudnicy, kotřiž bychu pjenjezy rady wzali, wšak žanu šansu nimaja. Policija dźě znaje městno zražki, barbu wobškodźeneho awta a rozměr wobškodźenja.
Sejm změni wustawu
Berlin (dpa/SN). Zwjazkowy sejm chcyše dźensa w běhu dnja Zakładny zakoń změnić. Tak by Zwjazk přichodnje tež direktnje do kubłanskeho systema inwestować móhł, štož Zakładny zakoń dotal zakazuje. Do wothłosowanja je so zwjazkowy financny minister Olaf Scholz (SPD) hišće raz naležnje za změnu wuprajił. Tak móhł Zwjazk wjele miliardow eurow za ponowjenje šulow nałožić, wón argumentowaše. Jako jenička strona je AfD přećiwo noworjadowanju.
Hotuja so na wjeršk G 20
Buenos Aires (dpa/SN). W argentinskej stolicy Buenos Airesu wočakuja dźensa wječor prezidenta USA Donalda Trumpa na jutře zahajacy so wjeršk wodźacych industrijnych a prohowych statow G 20. Hospodarskeje krizy w Argentinskej dla je prěnje wjerškowe zetkanje w Južnej Americe jara dwělomne. Něhdźe 25 000 policistow ma wěstotu zaručić a namócnosćam, kaž na minjenym zetkanju w Hamburgu, zadźěwać. Přećiwnicy wjerška G 20 su hižo za dźens wječor prěnje protesty připowědźili.
Płaćizny energije přiběrali
Podpěraćeljo ciwilneho procesa přećiwo tekstilnemu discounterej ...
Marko Šiman: Zmylki zašłosće skorigować
Budyšin (SN/MkWj). Ignoranca minjenych 30 lět napřećo Łužicy měła so skónčić. „Trjebamy jasny signal, zo je wuhlowa komisija spóznała, kak wažne koncepty přichoda za Łužicu su. Runje tak wažne je, zmylki zašłych lět korigować.“ To rjekny serbski zapósłanc CDU w Sakskim krajnym sejmje Marko Šiman na wčerawšej nowinarskej rozmołwje w Budyšinje. Šiman kritizuje, zo su „masiwne zmylki“ wot lěta 2004 wosebje we Łužicy hoberske straty zawinowali. Wot toho časa je něhdźe 150 000 ludźi Łužicu wopušćiło. Wuhlowa komisija, kotraž tuchwilu wo strukturnej změnje po kóncu zmilinjenja brunicy wuradźuje, ma šansu, zmylki zašłosće z wotpowědnymi naprawami znajmjeńša zdźěla skorigować.“ Šiman je wuhlowej komisiji mjeztym wotpowědne stejišćo zapodał.
Dobre wuměnjenja na gymnaziju
Podstupim (SN/MkWj). Dosć njewšědny wopyt měješe Rada za serbske naležnosće Braniborskeje na swojim wutornym posedźenju w Podstupimje. Christiane Wienert, zastupnica tamnišeho Helmholtzoweho gymnazija, chcyše so wo dźěle rady a wo dwurěčnosći scyła wobhonić. Na starosławnym gymnaziju poskićeja dwurěčny němsko-jendźelski kurs za politiske kubłanje.
Serbska rada móžeše wutoru tež rozprawu braniborskeho kubłanskeho ministerstwa wo stawje wuwića Delnjoserbskeho gymnazija w Choćebuzu na wědomje wzać. Ministerstwo wobswědča kubłanišću w materielnym kaž tohorunja w personalnym wobłuku dobre wuměnjenja, kaž předsyda serbskeje rady Torsten Mak na naprašowanje SN zdźěli.
W zwisku z přetwarom Serbskeho muzeja w Choćebuzu dyrbjachu so porno tomu ze wšelakimi problemami rozestajeć. Nawoda Choćebuskeho měšćanskeho muzeja Steffen Krestin informowaše, zo stare twarjenje stajnje zaso nowe problemy a ćeže zawinuje.
Problem njepřestorčić!
Přichod hórnistwa w Sakskej a Braniborskej wšo wobknježaca tema
Podstupim/Drježdźany (SN/BŠe). Zo by rekultiwěrowanje łužiskich brunicowych jamow financnje zawěsćene było, žada sej posudk, zaměrowu towaršnosć wutworić. Dale z analyzy Sakskeje a Braniborskeje wuchadźa, zo hórnistwowe předewzaće Łužiska energija a milinarnje (LEAG) dosć za zawěsćenje płonin hladajo na nowowužiwanje čini, kaž braniborske hospodarske ministerstwo zdźěla. Přidatnu wěstosć pak ma namjetowana braniborska zaměrowa towaršnosć skićić, kotraž dyrbjała w padźe insolwency LEAG zapřimnyć móc. Podobne postupowanje je tež w Sakskej předwidźane. „Wuslědki posudka njespokojeja“, wuzběhny zapósłanča Braniborskeho krajneho sejma Heide Schinowsky (Zeleni). „Zo so rezerwy wutworja, na tym nichtó njedwěluje. Hač pak budu dosahać, je prašenje.“
Plany wuwića města předstajiła
Budyšin (CS/SN). Dobre powěsće je Budyska měšćanostka za twarstwo Juliane Naumann sobu měła, jako zawčerawšim, srjedu, čłonow Budyskeho měšćanskeho zwjazka SPD wopyta. Wona rěčeše wo idejach za dalše wuwiće města.
Centralny dypk je wuwiće wobydlerstwa. Julianje Naumann je wažne, młodych ludźi pohnuć, zo w měsće wostanu abo so zaso nawróća. Tuž dyrbjeli so dalše bydlenske štwórće wutworić. Jedna móžnosć by była, hižo njewužiwane małozahrodki jako bydlenjotwarsku kónčinu wupokazać. Tež zelene pasma w měsće wuwić je wažny faktor žiwjenskeje kwality, štož bu dotal zanjechane. Přiwšěm ma so wězo tež na wuwiće přemysłowych kónčin dźiwać, Naumann potwjerdźi.
