Skónčnje zaso mišterstwa! Dwě lěće dołho njebě w tójšto sportowych družinach na amaterskej runinje žane prawidłowne wubědźowanje móžno. Wjele zarjadowanjow bu wotprajenych abo přesunjenych, tak zo je nětko ćim bóle pytnyć, kak je sportowcam tute měrjenje z konkurencu pobrachowało. Za serbskich koparjow na přikład změje bórze dołhe čakanje na 4. europeadu swój kónc. Sym wćipny, hač budźe w Korutanskej zas podobny nawal serbskich fanow, kaž 2016 w Južnym Tirolu.