Jónu wob lěto ma zjawnosć składnosć, sej w Pančicach-Kukowje dźěłarnje swjateho Michała wobhladać. Wosebje w najnowšim času tam stajnje něšto noweho nazhonješ.
Pančicy-Kukow (JK/SN). Dźěłarnja swjateho Michała w Pančicach-Kukowje bě minjeny pjatk swoje wrota zajimcam zaso šěroko wotewrěła. Hosćo dźěłarnje sej najwšelakoriše zaběry zbrašenych wobhladachu a běchu sej po tym přezjedni, zo stej dźěło a kreatiwne tworjenje jara dobra móžnosć, zbrašenych zapřijeć do wužitneho skutkowanja. Widźomne a čujomne wjeselo a hordosć zaběranych zbrašenych stej wuraz wuspěšneje integracije a posrědkuja začuće, zo su zbrašeni na swoje wašnje zbožowni.
