Na lětušim 24. Budyskim měšćanskim běhu je so minjeny měsac 2 079 sportowčow a sportowcow wubědźowało. To běše nowy rekord w stawiznach lěta 1994 załoženeho woblubowaneho wurisanja. Što pak je tomule běhej polěkowało?
Zakład smy my, horstka zahoritych Budyskich běharjow na srjedźnych a dlěšich čarach, 1988 sami tworili a pjećkilometrowski běh po arealu Budyskeho spjateho jězora organizowali. Lěto na to su w tymle wulkim kompleksu na iniciatiwu našeje komisije za běhanje při Radźe města kaž tež wočerstwjenskeho centruma rěčna zawěra Budyšin prěni pokalny běh wo atraktiwny „pućowanski pokal města Budyšin“ přewjedli. Wo tójšto hódnotnych mytow wojowaše tehdy hižo něhdźe 60 wobdźělnikow. Na hłownym běhu přez 7,5 km móžeše so Heiko Lehmann z Budyšina w 25:30 min jako prěni pokalny dobyćer přesadźić. Pola žonow wubědźi sej w běhu na 3 km Bärbel Knaak dobyće, pozdźiša mandźelska Heika Lehmanna.