Wirusa dla hišće ničo wotprajić njetrjebali

Budyšin (SN/MiR/JaW). Corona-wirus tuchwilu cyłe naše žiwjenje postaja, tež w Serbach. Wšako su mjeztym tohorunja ludźo we Łužicy wot infekcije potrjecheni.

Tak su serbske institucije na wuwiće reagowali a škitne naprawy zawjedli. Domo­wina ma wot póndźele rjadowanje, zo móža přistajeni tři dny doma wostać, jeli so chori čuja. Wot štwórteho dnja je chorobny lisćik trěbny. Rjadowanje płaći najprjedy hač do jutrow. Kaž zdźěli nowinski rěčnik třěšneho zwjazka Marcel Brauman, dochadźeja hižo naprašowanja z wukraja, nastupajo jutry. „Češa, kotřiž wuprawu do Łužicy planuja, su so pola nas naprašowali, hač měli ju wotprajić. Sym jim zdźělił, hdźe je wosebje wjele ludźi­, ale su tež kónčiny, hdźež móžeš křižerske procesiony derje widźeć, bjeztoho zo stejiš wosrjedź masow. Rozsudźić pak dyrbja sami, hač přijědu.“