Wirusa dla mjeńšinowe zarjadowanja wohrožene, europeada dotal nic
Budyšin/Flensburg (SN/JaW/MiR/jak). Corona-wirus so mjeztym tež w Sakskej rozšěrja. Po tym zo běchu tydźenja prěni pad infekcije w swobodnym staće zwěsćili, je ličba wobkrućenych schorjenjow na dźesać rozrostła, štyri z nich w Budyskim wokrjesu – a to we Wojerowskim regionje.
Chorownje w Kamjencu, Budyšinje, Biskopicach a Wojerecach su na móžny pad schorjenja z corona-wirusom přihotowane, kaž su wšitke štyri stejnišća na naprašowanje zdźělili. Wšitke maja wobstajny zwisk ze strowotniskim zarjadom wokrjesa a su wo aktualnym połoženju wobhonjene. Nowinski rěčnik Wojerowskeho klinikuma Łužiska jězorina Gernot Schweitzer skedźbni na eksistowacy plan alarmow za chorownje, kotryž rjaduje wotběhi, dyrbjeli-li wjetšu ličbu schorjenych přijeć. „Škitne wuhotowanja, kaž hubny škit, desinfekciske srědki a škitnu drastu mamy standardnje na składźe“, Schweitzer informuje.
