Bertelsmannowa załožba wulke regionalne rozdźěle w Němskej zwěsćiła
Gütersloh (dpa/SN). Chudoba dźěći w Němskej wostanje po najnowšim přepytowanju z njezměnjenymi wulkimi ličbami dale „njewobdźěłane wulkotwarnišćo“. Něhdźe 2,8 milionow dźěći a młodostnych wotrostuje w chudobje – 21,3 procenty wšěch młódšich hač 18 lět, Bertelsmannowa załožba wčera rozprawješe. „Hižo wjele lět je bój přećiwo chudobje dźěći jedne z najwjetšich towaršnostnych wužadanjow w Němskej.“ Najebać to su wot 2014 w cyłoněmskim přerězku lědma polěpšenja spóznajomne. Wjace hač kóždy pjaty wotrostowacy je potrjecheny – z wulkimi regionalnymi rozdźělemi. Koronapandemija hrozy problem hišće přiwótřić, załožba zwěsća.
