Budyšin (SN/MiR). 55 angažowanych skupin młodostnych kaž tež towarstwow z Budyskeho wokrjesa chce so na lětušej 48hodźinskej akciji wobdźělić. Mjez poskitkami su někotre serbskich młodostnych. Přizjewili su so štyrjo zajimcy z wobłuka zarjadniskeho zwjazka Při Klóšterskej wodźe a z Kulowa. Regionalny běrow Rěčneho centruma WITAJ w Chrósćicach so wo nje stara. RCW słuša k nošerjam akcije za serbski sydlenski rum runje tak kaž Budyski Kamjentny dom za Budyšin a za region sewjerowuchodnje sprjewineho města.