„Złota šerpa“ mjenuja wubědźowanje, při kotrymž so dorost mnohostronskeho jěchanskeho sporta na němskej runinje měri. Jěcharki a jěcharjo, kotřiž njejsu starši hač 16 lět wubědźuja so w pruwowanju klasy E. Kóždy zwjazkowy kraj wobdźěli so z jednym abo wjacorymi mustwami na turněrje. Tež Sakski krajny zwjazk za jěchanski sport bě cyłk z pjeć konjacymi sportowčemi a sportowcami zestajał. Woni běchu so wot 16. do 18. oktobra do Langenfelda ke krajnej jěchanskej šuli do Porynsko-Pfalcowskeje na němske mišterstwa podali. Tež tři serbske jěcharki běchu so ze sakskim mustwom na zarjadowanju wobdźělili. Běchu to Franciska a Felicitas Bobkec z Miłoćic a Marija Bobkec z Worklec. Po napinacym, ale tola wulkotnym dožiwjenju je so Jakub Bobka z jěcharkami rozmołwjał.
Kak sće so docyła za tute zarjadowanje kwalifikowali?