„Při Krabatowym puću“ we Worklecach maja wosebite přebywanišćo
Worklecy (aha/SN). „Worklecy su wo dalšu zajimawostku bohatše“, wuzběhny minjeny pjatk wjesnjanosta Franc Brusk (CDU) składnostnje dnja wotewrjenych duri dnjoweje hladarnje Carity „Při Krabatowym puću“. Wón nańdźe připóznaće, zo bu zawrjena předawarnja w běhu jednoho lěta dnjowa hladarnja za staršich ludźi, kotrejež flair a wuhotowanje pyta swojeho runjeća. Z rjanym, lóštnym programom dźakowachu so Jěwje-Mariji Šnajderowej a jeje mandźelskemu Carstenej za jeju angažowane dźěło wšě dźěći Worklečanskeje pěstowarnje.
W nadawku Hornjołužiskeho zwjazka Carity z.t., kotryž je nošer dnjoweje hladarnje z 18 městnami, dźakowaše so nawodnica hladanskeje słužby Susan Kummer, kotraž je twar přewodźała a runočasnje při přewinjenju běrokratiskich zadźěwkow stajnje k pomocy była. W běhu dnja wuži něhdźe połsta ludźi, wobkedźbujo a dodźeržo předpisy hygieny, wšě rumnosće z cyłkownej płoninu, kotraž wučinja 300 kwadratnych metrow.
